雖然而家好多人都唔敢出街食，唔少店舖亦暫停營業，不過冇嘢可以阻到港人想食打卡下午茶嘅決心！而家好多餐廳同酒店都再次開拓外賣服務，當然連Afternoon Tea都有得外賣喇～有時WFH返到悶悶地，喺屋企嘆返個靚靚下午茶都唔錯，可以打卡而且食得放心，最緊要係可以調劑下心情嘛！

意大利百年烘焙品牌 Giovanni Pina 

來自意大利嘅大師級百年烘焙品牌，今期推出嘅外賣下午茶套餐所有甜鹹點都由意大利甜品大師Giovanni Pina精心炮製，包括自選2款件裝蛋糕、6件雜錦手工迷你撻、魚子醬蟹肉焗布甸、香煎鵝肝脆多士及36個月巴馬火腿伴鮮無花果，留喺屋企都可以味遊意大利～

圖: 官方Facebook

價錢：HKD$318.4（兩位用）

英式外賣下午茶禮盒 Vivienne Westwood 

就算喺屋企嘆下午茶都可以好有儀式感㗎～呢間著名英國品牌開設嘅咖啡廳推出英式外賣下午茶禮盒，傳統三層架演變成酒紅色三層禮盒造型盛載，好英倫風。共有4款甜點同5款鹹點。包括迷你法式蛋白檸檬撻、特濃朱古力慕絲百利酒盆栽蛋糕、迷你紐約芝士蛋糕、馬卡龍、意式蕃茄伴水牛芝士多士同英式鬆餅等。溫馨提示要早3日預訂呀。

圖: 官方Facebook

價錢：HKD$568（兩位用）

全新外帶四層架下午茶 Sevva

三層架都未夠威，呢間酒吧餐廳推出造型好別緻嘅外賣四層架下午茶！同樣鹹甜點俱備，招牌和牛牛肋骨漢堡好出色，牛肉充滿肉汁同牛香。甜品包括焦糖脆忌廉雪芳蛋糕同朱古力軟蛋糕配香橙果醬等，色香味俱全。

價錢：HKD$720（兩位用）

悠然春日下午茶 Royal Delights

酒店集團創立嘅糕點品牌，所有糕點都好高質。最近品牌推出悠然春日下午茶，除咗鹹點多口味三文治外，仲有多款招牌甜品，如無粉朱古力松露蛋糕，松露香氣撲鼻，同朱古力好夾；另外紅桑子白朱古力慕絲蛋糕酸酸甜甜又幾開胃。早一日訂仲有8折添～

價錢：HKD$338

外賣兒童下午茶 港島香格里拉酒店大堂酒廊

一家大細想喺屋企嘆afternoon tea，呢間酒店餐廳同時推出外賣下午茶同外賣兒童下午茶，好貼心！前者包括脆脆覆盆子朱古力唇膏及柚子士多啤梨蜂巢等，而細路版就有小熊榛子朱古力蛋糕、士多啤梨泡芙等，小朋友實鍾意食！記得要早一日預訂呀～

外賣下午茶價錢：HKD$688（兩位用）
外賣兒童下午茶價錢：HKD$320（兩位用）

夢幻至臻下午茶 歷山酒店 

呢個下午茶好抵食，$238起就可以嘆盡12款甜鹹點，仲有唔少係矜貴食材添～如鴨肝慕絲脆多士配魚子醬，油香十足但完全不膩，仲有淡淡白酒香氣。鮑魚酥皮盒香軟入味，配埋新鮮焗製嘅酥皮，淋上鮑魚汁後口感依然酥脆。

價錢：HKD$238

粉醉情迷下午茶 視佳廊

過完2月14，唔好忘記仲有個3月14喎。呢間酒店嘅外賣下午茶以粉紅色為主題就襯晒啦！包括有五款鹹點同五款甜點，都係有中西合璧嘅玩味元素，例如蜜汁叉燒滑蛋三文治，選用米芝蓮推介餐廳天寶閣嘅叉燒剁細成肉醬，流心蛋汁同蜜汁叉燒鹹甜相配，有驚喜！嘉應子鵝肝醬多士都好有特色，嘉應子平衡了咗鵝肝嘅油膩口感，又幾開胃。

價錢：HKD$436

嚐泰．外賣盛饌盒  Mango Tree Kitchen 

下午茶唔一定係英式或者西式，亦可以係泰式！呢間泰國菜餐廳推出以惹味大頭蝦為主角嘅外賣下午茶，鹹點有一口海南雞飯、炭燒豬頸肉三文治、柚子沙律、溏心女婿蛋、酥炸黃金蟹鉗，甜品就有一口芒果糯米飯、斑蘭千層糕、椰青大菜糕及馬卡龍。再配搭兩杯自選泰式飲品，過一個「泰」識嘆嘅下午茶時光。

價錢：HKD$228（兩位用）

文: Yanica