繼炸雞放題後，尖沙咀新派韓菜推出任食紐西蘭青口，限時90分鐘，可品嚐到兩款不同煮法嘅青口煲。鍾意食青口嘅各位，有無信心拆到超過50隻青口先？

任食青口有兩款口味，一款係加入韓國獨有嘅馬格利米酒煮成嘅牛油馬格利青口煲。大廚先將洋蔥、蒜蓉炒香，再加入黑椒粒、鹽，然後依次放入青口、馬格利酒。大廚將煮熟嘅青口夾起後，在剩餘嘅醬汁加入牛油，煮成蒜蓉牛油汁後就淋上青口，搞掂！

每份入面約有11隻青口，唔夠嘅話當然可不斷encore！馬格利酒本身偏甜，加埋洋蔥、蒜蓉後甜味減輕不少，酒味亦不濃。

青口充滿蒜香，而且大隻又鮮甜，好味！

而另一款係泡菜蕃茄青口煲，用韓國泡菜、番茄汁去煮，味道濃郁惹味啲。臨上枱前，廚師灑上Mozzarella芝士，鮮甜青口加上半融芝士，味道好豐富。

醬汁較為濃稠，味道除咗微酸，仲有少少鹹香。入面有少許泡菜以及番茄汁增加口感！

除咗青口，優惠跟送一份番薯條或薯條，以及1杯飲品。識食嘅當然揀番薯條啦，每條都有滿滿軟糯微甜嘅薯肉，炸得香口。

番薯條可沾蒜蓉牛油汁及番茄泡菜醬，吸汁又惹味。

試後感：
開飯仔挑戰任食，最後只能食到一份牛油馬格利青口煲、一份泡菜蕃茄青口煲，KO咗22隻青口咋！因為食晒一整份番薯條，所以建議各位，如果想回本，點都先食多啲青口，之後再食好易飽肚嘅番薯條。

$298任食紐西蘭青口
供應期：4月16日至5月31日逢星期一、二
時限：90分鐘
價錢：$298/位，另設加一
注：公眾假期除外

The Joomak
地址: 尖沙咀廣東道3-27號海港城海運大廈3樓LCX 34號舖

文：Joy