新一年開飯仔先祝各位來年日日有食神，食極都唔肥！回顧返上年飲食界都有唔少大事件，好似有國內火鍋名店海底撈登陸香港、紅爆鼎爺開私房菜、卡通主題café開完又執、米芝蓮捧起粥麵小店等等。當然仲有各式各樣嘅新店同新食品，麻辣火鍋、omakase、片皮鴨、葵廣小食、台式飲品，真係數都數唔晒。今次開飯仔一於靠估，分享吓2018年又會吹起邊股飲食潮流先，拿拿拿戴定頭盔，以下純粹個人推測，不喜勿插，估唔中唔好打面呀。
1, 繼續過江龍
年年都有風頭強勁嘅過江龍餐廳殺入香港開分店，相信2018年都唔會例外，好似有早前報導過嘅日本鰻魚專門店宇奈とと、拉麵店麵屋一燈、米芝蓮三星壽司鮨齋滕、新加坡天天海南雞飯、美國連鎖漢堡Shake Shack、Ralph Lauren咖啡店等等，唔使飛去外國都食到，期待！
圖：2, 下一個Chef Le Mon
上年有謝霆鋒大廚奇招煮食叫一眾網民嘩然，亦有鼎爺私房菜成萬蚊一圍都book爆，唔少明星名人都踩過界開餐廳，可見到明星效應仍有一定叫座力。今年又會有邊個做老闆、邊個化身廚神，成為下一個Chef Le Mon？會係秋生哥定係杜汶澤呢？
圖：謝霆鋒《鋒味》
3, 越食越刁
此「刁」有刁鑽同嘴刁兩個意思，上年有唔少較偏門菜系餐廳誕生，好似如老撾菜、秘魯菜Tokyolima及拉丁美菜Picada；巴基斯坦及印度菜New Punjab Club等，相信來年會繼續百花齊放。菜式、食材及肉食部位亦越食越精，好似之前唔流行嘅Flat Iron牛扒、火鍋要食封門柳、吞拿魚腦天，梗係食到嘴都刁埋啦。
圖：4, 本地食材枱頭
以前覺得外國飛機貨先至係皇道，雖然香港嘅天然資源未必咁豐富，但其實都有唔少本土出產嘅農作物、海鮮、肉類等好食材，除咗可以支持吓本地農業、減少碳足印，新鮮食材仲會保持營養價值同味道添！估計更多餐廳會選用本地食材，減少浪費、剩食及廚餘都要做嘅。
圖：Locofama
5, 米芝蓮攻陷東南亞
去年米芝蓮指南首次推出泰國曼谷版，首次面世仲有嚟緊一月嘅台灣版，以及已公佈2018年嘅廣州版，為世界第 31 個地區、日本以外亞洲第7本指南。來年又有新地區都唔出奇，暫時未有指南嘅東南亞國家有越南、印度同印尼，會唔會有其中之一？
6, High Tech餐廳
用高科技融入食物已經唔係新事，簡單好似透明奶茶檸檬茶、黑色礦泉水，餐廳就會應用投射配合菜式，甚至係3D打印機print出來嘅食物、機械人侍應等，來年好大可能會成新趨勢，可能遲啲會有VR餐廳、AR點菜！
圖：7, 酒店餐廳年輕化
今年有唔少名牌酒店落成，好似係美利大廈The Murray、前身為新世界中心嘅香港瑰麗酒店 (Rosewood)、預計於2019年開業嘅聖瑞吉(St. Regis)。酒店餐廳唔再行grand路線，反而更年輕更hip，帝苑酒店J’s Bar Bistro、嘉里酒店嘅紅糖等，當然自助餐都係亮點之一啦。
圖：8, 肉食定素食？
綜合美國Whole Foods同英國Waitrose兩間超市對2018年潮流預告，有個有趣發現。Whole Foods認為素食當道，因此植物性蛋白食品如素肉、果仁奶會繼續有需求，但Waitrose卻覺得麻甩佬食品(dude food)，好似大魚大肉同炸物將大行其道。素食店越開越多係真嘅，同時和牛韓牛仍有捧場客，兩種飲食態度各有支持者，打和啦好嘛？
圖：9, 東南亞美食繼續hit
有冇發現今年多咗東南亞食店？泰式船麵Samsen、台灣牛肉麵請坐獲米芝蓮推介，向越南Lunch Lady致敬嘅Cô Thành贏盡口碑，仲有一系列越南牛河、星馬喇沙、日式拉麵，加上台式飲品再次崛起，2018年應該仲會陸續有嚟！開飯仔最想翻hit嘅係台式麵線，唔知有冇望？
10, 最IG-able街頭小食
街頭小食通常都玩快閃，興完一輪又改頭換面，追都追唔切！上年出現過玉子燒、梳乎里班戟、麻辣燙、北京烤餅、漸層飲品、手作水果茶等，預計今年繼續相機食先！唔少外國預告精緻印度菜將會興起，但估計香港未必會大紅，開飯仔就話串燒、炸物類、泰式或袋裝飲品都有機會跑出，而咖啡及茶將會更加專業。
圖：文、相：Perrins