嚟到年尾支出特別多，真係好容易使多咗。荔枝角最近新開一間專做台灣菜嘅外賣店，所有食物都係$30樓下，而且都係即叫即整，係誠意之作，大件夾抵食啊！
芋泥肉鬆吐司($13)
早餐限定嘅芋泥肉鬆吐司，芋頭煲熟後分別切片同切粒，咁食嗰陣就會食到粒粒芋頭，味道香濃，加埋肉鬆真係好足料～而且咁大件只係賣$13，而家真係好難搵到㗎喇。
古早滷肉飯($29)
呢個古早滷肉飯賣點就係大大件嘅滷肉，選用五花腩，滷汁甜鹹嘅味道恰到好處。
台式肉鬆蛋捲餅($25)
講到台灣菜又點少得蛋餅，呢度嘅蛋餅先將餅皮煎香，再加入雞蛋煎成蛋皮，食落外皮特別香脆，比起台灣食嘅口感仲豐富。
另外仲有風味鹽酥雞($26)及涼拌皮蛋豆腐($19)，鹽酥雞加入鹽香粉及胡椒粉又幾惹味，涼拌皮蛋豆腐又幾開胃喎～
地址: 荔枝角長沙灣道833號億利工業中心地下6A1號舖
文、相、片: Yanica