第10位Pheromone Dessert
旺角少女系甜品店，隔半年後重新上榜。特大棉花糖雪糕杯依舊都係要畀相機食咗先，仲有冰火焦糖燉蛋都係寵兒，上層微微燒焦嘅蛋白充滿動感，薄脆焦糖下嘅燉蛋滑嘟嘟，無論係相機定係囡囡都一樣咁enjoy。
(Photos by foodxphotography&conconyan)
第9位米走雞（*新上榜）
今年冬天雖然唔係好凍，但邊爐同雞煲仍然都係要食嘅。呢間雞煲笨唔係普通嘅雞煲，而係極邪惡嘅芝！士！雞！煲！成鍋雞上面佈滿芝士碎條同芝士汁，滾咗之後成煲金黃色，仲做到拉芝效果！未講完，之後仲可以加多個公仔麵變芝士撈丁呀！媽呀點忍？
(Photos by connie28_06&lokyanyan)
第8位Black As Chocolate （*新上榜）
來自台灣嘅人氣甜品店，初到埗就已經成功爭取上榜。暫時未有件裝蛋糕發售，一買就要買一個，不過依然無損佢嘅受歡迎程度。焦糖香蕉朱古力蛋糕、黑加侖草莓朱古力蛋糕、經典朱古力蛋糕、榛果朱古力蛋糕再加上幾款季節性嘅蛋糕，朱古力味濃郁，加上型格嘅包裝，就足以令一眾朱古力迷神魂顛倒。
(Photos by eat_eat_everyday&VCY)
第7位Pantry Bread & Pastries （*新上榜）
位於九龍城嘅糕餅店，櫥窗裡面每件蛋糕都相當吸睛，有啲成粒lego咁款，有啲又相當精緻，重點係無論外型定係口味都係比較少見嘅，例如開心果熱情果朱古力餅咁，上面有幾塊花瓣不特止，仲有幾滴啫哩扮嘅偽露水，淨係睇樣已經呃晒like，用嚟送禮一流。
(Photos by angel827 & Latte810)
第6位鮨文
正宗日本菜，最平600蚊就食得到充滿日本味道嘅omakase！呢度嘅拖羅固然好食，不過海膽杯同樣令人期待，雖然有飯墊底，但疊到高一高嘅海膽絕對足秤，再放多隻牡丹蝦喺頂，真係會係吸引到等唔切畀部相機食就自己食咗先㗎，如果你掛住畀相機食，師傅分分鐘收起唔畀你食！
(Photos by Cur& MissGoldenTongue）
第5位阿來泰式地道風味（*新上榜）
旺角泰菜小店，雖然無豪華裝修只係普通餐廳格局，但勝在泰國大廚夠用心。招牌菜係泰式海南雞飯，雞肉嫩滑之外油飯更係亮點所在。燒鰂魚加鹽燒到恰到好處，加埋香料味道誘人。其他港人熟悉嘅泰菜例如冬蔭功湯同沙爹串燒亦有水準。
(Photos by Gourmet KC)
第4位Lex Coffee（*新上榜）
舊樓改建而成嘅特色Cafe，設有開放式天台。食物方面以西餐嘅意粉、甜品同All day breakfast為主。飲品就以招牌Lex Chocolate最有特色，用意大利Venchi朱古力品牌做成朱古力冰粒，飲之前加入熱牛奶，朱古力慢慢融化喺牛奶當中，好玩又滋味。
(Photos by P.J.& poortravellers)
第3位BEL CIBO Restaurant
綜合意、法、葡多國菜嘅Fusion餐廳，繼一月打入第七位之後再次上榜。餐廳裝修有情調，從前菜、湯、主菜到甜品都水準平均，特別係黑松露醬煮原隻鮑魚同蟹肉芝士忌廉煮牛油梨釀大傘菌得到唔少食客推介，難怪成為聖誕聚餐選擇之一。
(Photos by 長崎良美~*)
第2位Plato（*新上榜）
旺中帶靜嘅休閒Cafe，供應英式風格為主嘅Fusion西餐，例如All day breakfast就跟返英式正宗風格，迎合Go Green潮流更有素食版本。其他餐點方面，水牛雞翼醬汁調味得宜，意大利飯或意粉亦有唔少款式任揀，總有一款啱你口味。
(Photos by Lawrence Lau& Joycee)
第1位BAKE CHEESE TART
連續四個月上榜，喺12月成功奪得2015年最後一個冠軍寶座。無論係未試過嘅新食客定係忠實粉絲，喺排隊熱潮稍微減退嘅時候嚟潮聖。難得佢地嘅半熟芝士撻開業一排之後依然保持到日本總店嘅高水準，睇嚟新一年亦將會繼續「芝」配各位芝士迷！
(Photos by foodien& foodlife_kimkai
按此瀏覽「最新餐廳排行榜30強」
文：Marcus/Kar/Cathy
隨時接收最新資訊
讚好OpenRice專頁！
關鍵字
甜品
朱古力
Cafe
芝士撻
泰國菜
西餐廳
排行榜
滋味分享
複製到剪貼簿