好多人對甜品嘅印象就係甜同易膩，但其實用啲清爽健康嘅食材感覺就會唔同～今期介紹5款喺香港有得食嘅豆腐味甜品畀大家，幾啱夏天食。

目錄

清香豆腐芝士餅 Shelly Cake Express

圖: wingyi23

放假想遠離市區嘅，可以考慮下南丫島呢間cafe呀～主打唔同口味嘅芝士蛋糕、雪糕及曲奇，招牌豆腐芝士餅balance做得好好，有芝士味同時又唔會掩蓋咗豆腐嘅清香味道！蛋糕上有少量乾花令到蛋糕嘅層次更加豐富，配埋花茶一齊食真係冇得輸。

玄米茶豆腐慕絲蛋糕 Bestow 

圖: irishighlighter

行白調簡約路線嘅咖啡店，唔少人都係特登為佢哋嘅甜品而去㗎。主要供應慕絲蛋糕、巴斯克蛋糕同Tiramisu，推介玄米茶豆腐慕絲蛋糕，外層係豆腐慕絲，內層係玄米茶味慕絲配一層海綿蛋糕底，入口主要食到豆腐味再帶淡淡玄米茶香，幾清新。

幼滑豆腐芝士蛋糕 Dozy

圖: vvv.foodies

另一間以豆腐芝士蛋糕作主打嘅咖啡店，呢間嘅豆腐芝士蛋糕首先會感受到芝士嘅鹹香，再食到豆腐嘅味道，特別嘅係口感好幼滑，上面灑咗啲黃糖，好似食緊豆腐花咁，又可以增添口感，幾有驚喜。

滑捋捋豆腐布甸 綠林甜品

圖: Jenjen3

雖然係老字號，但都有供應唔少新派港式糖水，與時並進。呢個創新嘅豆腐布甸就深受歡迎，口感唔似平時嘅布甸咁軟，反而好似豆腐咁挺身啲，入口富有豆香味，厚實綿滑，加上點點淡奶，食多幾碗都無問題呀。

香濃豆腐味軟雪糕 「迆」雪糕專門店

圖: hk.good.food

呢間雪糕小店正以本土口味為主題，全部雪糕都係每日開店前即場新鮮製作，以植物奶代替牛奶，素食朋友都食得，仲冇咁易膩添！豆腐口味雪糕以真·本地有機黃豆製作，豆腐味好濃！仲可以升級拼埋雪條食，啱晒炎炎夏日！

文: Yanica