夏天熱辣辣，想食啲清爽又解暑嘅甜品？今次就同大家分享香港4間高質Froyo店，酸酸甜甜又冇咁邪惡，啱晒怕熱又怕肥嘅你！

開心果味Froyo Drool Froyo

圖：missyhildanl

喺中環開咗新分店嘅超人氣Froyo，長期都有人排隊㗎～主打用低脂希臘乳酪製作Froyo，口感夠滑又唔太邪惡。口味方面都幾有驚喜，如抹茶園口味底層係原味froyo，上面加咗濃郁嘅抹茶醬，最驚喜係佢中間既topping係藍莓粒，酸酸甜甜同抹茶好夾；醉冧RUM加咗冧酒浸提子同焦糖杏仁太妃糖，甜中帶酒香又唔會太濃，食落啖啖有層次。近期仲有隱藏版開心果口味，加埋開心果醬、開心果脆粒同埋脆杏仁片，一試真係停唔到口～

選用希臘乳酪 Smile Yogurt & Dessert Bar

圖：JoyfullFoodstagram

主打用希臘乳酪製成嘅Froyo，乳香濃郁之餘又保留到低脂輕盈口感，酸甜適中，食落清爽唔膩，深受一班注重健康又鍾意甜品嘅人歡迎。店內Froyo款式以自選配料為主，佢哋嘅配料都好有特色，如菠蘿脆片、抹茶糯米糍、開心果布甸同芒果熱情果棉花糖等，層次相當豐富。亦有其他特色款式，如開心果、士多啤梨同朱古力主題嘅乳酪杯，重點係賣相都好靚，啱晒打卡。

自選多樣化配料 Yo Mama Frozen Yogurt

圖：leetszhin

講起香港最早期做乳酪雪糕嘅店，呢間品牌可以話係唔少人嘅童年回憶～主打酸酸甜甜嘅低脂乳酪雪糕，可以自由揀味、揀配料，成件事好有自己style，食落又清爽冇負擔。乳酪口味有原味、士多啤梨、桃同芒果等，有時會推出限定口味𠻹。配料選擇都有好多，包括多款新鮮水果、椰果、煙韌嘅麻糬、有咬口嘅爆爆珠同健康啲嘅果仁等，超豐富！

旺角抵食之選 CIN吸飲

圖：misu_pom

旺角商場地庫嘅乳酪雪糕小店，主打自助式froyo體驗，客人可以先揀好杯裝尺寸，然後自由配搭心水配料同醬料，食幾多加幾多，全程自己砌，自由度夠高，玩味十足。乳酪雪糕用希臘乳酪製成，奶香淡淡唔會太甜，酸甜平衡得幾好。配料選擇非常豐富，由水果、奶凍、啫喱到自家製mochi、oreo碎、乳酪爆珠應有盡有，仲有唔同醬料可以加，好似芒果醬、朱古力醬、草莓醬等。

文：Yanica
編：Cathy