講起近年人氣麵包，鹽麵包絕對係新一代麵包控嘅心頭好！鹹香牛油味配上煙韌口感真係超滿足～今次就同大家整合4間香港必試鹽麵包，睇吓邊間最啱你口味。
日本過江龍白松露鹽麵包 TruffleBAKERY
圖：來自東京嘅人氣麵包店，一開幕已經引起唔少松露控注意，因為佢哋主打嘅就係全城熱話嘅白松露鹽包，仲係木村拓哉同二宮和也都大推嘅款式，話題性十足。主角白松露鹽包賣相低調簡約，外形似一般豬仔包，不過表面灑上少量法國松露鹽，拎上手已經聞到陣陣松露香。麵包外皮焗得金黃微脆，內層軟熟煙韌，入口有陣陣牛油香，再混合淡淡白松露嘅清香，鹹香中帶點優雅。雖然松露味唔算非常濃烈，但勝在清雅自然，適合鍾意低調香氣嘅朋友。
明太子奶油鹽捲 午夜麵包俱樂部
圖：位於大坑嘅小眾麵包店，由網店起家到而家有實體店，一直都深受麵包迷喜愛，店內氛圍文青簡約，適合想慢慢嘆個包嘅朋友。講到佢哋最出名嘅就係各款鹽捲，基本款奶油鹽捲簡單得嚟不失驚喜，新鮮出爐外皮香脆，內裡煙韌帶微微咬口，尾段先有牛油香滲出，突出麵粉本身香味，清新又唔會過於heavy。至於特別口味方面就有明太子同黑松露喇，明太子微鹹鮮香，層次豐富，超推介！
白松露發酵牛油海鹽可頌 Doughman
圖：店舖（IG）
同樣以白松露為主題！佢哋嘅鹽可頌走紮實同柔軟方向，適合鍾意有咬感但又怕太硬嘅朋友。最大亮點係佢嘅白松露牛油香氣，一切開會見到溶化嘅松露牛油，入口越嚼越香，配上法國海鹽點綴，鹹香與松露香完美融合。另一款推薦流心朱古力吉士醬鹽可頌，外層微脆，內裡注滿香濃朱古力吉士，甜度適中，帶輕微鹽味，層次豐富。
香氣滿滿原味鹽可頌 君蘭麵包廠
圖：本地人氣麵包店，主打簡單又高質嘅傳統港式麵包同歐式手工包。原味鹽可頌一打開紙袋就聞到陣陣麥香，包面灑上白芝麻香氣更突出。內裡質感鬆軟，麵包本身帶有淡淡鹹味，唔使加牛油同搽醬都已經好夠味，有種去韓國食鹽麵包嘅感覺，適合追求簡單原味嘅朋友，～
文：Yanica
編：Cathy
