想食泰國菜又想有非一般嘅體驗，可以試吓以下四間泰式 Cafe～主要供應泰式 Fusion 菜，環境舒適甚至有特別主題，啱晒成班朋友約埋 Gathering 兼打卡！

目錄

泰國水上市場主題  More Than Thai Cafe

以泰國水上市場為裝修風格主題嘅餐廳，佔地約 2,000 呎，設有船形特色卡座，私隱度高～必試招牌A4宮崎和牛船麵，採用日本直送A4宮崎和牛，湯底以幾十斤豬骨、鮮雞、豬血糕及泰國香料熬製而成，香濃得嚟飲完唔會口渴。幸福摩天輪小食拼盤包括榴槤酥球、班蘭包雞及米網蝦春卷等，啱晒打卡。當然唔少得飲品同甜品，全芒果沙冰芒選用呂宋芒或愛民芒等時令芒果沖調，於芒果蓉及沙冰面層鋪上一層厚厚芒果肉，好消暑。

泰式 Fusion 渡假風  ASOK THAI GARDEN 

圖: wai3aa3

元朗阿叔泰麵嘅姊妹店 Cafe，以泰式 Fusion 菜為主，採用藤椅、榻榻米座席等設計，一樣咁 IG-able！人氣菜式有蛋炒咖喱軟殼蟹，軟殼蟹炸得好香口，配上勁多蟹肉同埋融晒入咖喱裡面嘅蛋，送飯一流呀。冬陰功大頭蝦意粉都推介，大頭蝦彈牙惹味，意粉掛滿酸酸辣辣嘅冬陰功醬。食得泰國菜，甜品又點少得芒果糯米飯，但呢度就變成芒果糯米飯椰子雪糕，傳統嘅芒果糯米飯上加上椰子雪糕及雪糕筒，無論賣相定味道都有驚喜。

創意 Fusion 泰式 Cafe  Tommy Yummy 

圖: FoodDiaryhk116

一間充滿渡假風嘅泰國主題 Cafe，佢哋嘅菜式真係好有創意同啱晒相機食先。如呢個虎蝦海鮮混亂杯麵，麵質就同一般杯麵差唔多，以冬蔭公味為主，配上大蝦、青口及魷魚等海鮮，又幾惹味而且夠晒 Gimmick呀～仲有打拋豬肉碎煎蛋飯，香辣鹹香嘅肉碎配上流心煎蛋，無得輸嘅組合！最後甜品一定要試呢個芒果乳酪疊疊冰，如雪條一樣嘅新鮮芒果肉配上芒果冰磚，底下仲有綿綿冰同糯米飯，甜品控真係抗拒不了。

泰茶千層蛋糕  ChaTraMue Cafe

圖: ccrreami

來自泰國嘅過江龍泰式手標奶茶店，今年喺沙田就擴展做埋 Cafe！佢哋主打用招牌泰式奶茶製作而成嘅甜品，例如泰茶雪糕牛角包，濃郁雪糕配上鬆軟嘅牛角包又幾夾。泰茶飄雪嘅冰好綿密，加埋泰茶醬同奶油味道更 Rich，珍珠又可增添口感。另外仲有泰茶千層忌廉蛋糕，每一層嘅餅皮都好薄，Cream 又唔會太漏太甜，鍾意泰奶嘅朋友唔可以錯過。

文: Yanica