天氣又涼返啲，食火鍋想搞搞新意思唔難，一齊睇吓香港邊度有特色火鍋啦～
每日新鮮自家熬製湯底 四面泰泰式火鍋
圖：歡歡增肥之旅
呢間喺九龍城同沙田都有分店嘅泰式火鍋，真係將正宗泰國風味帶到香港！招牌秘製冬蔭功鮮蝦鍋，湯底用鮮蝦同泰式香料煮成，酸辣適中，仲有濃郁嘅蝦鮮味，簡直係泰式火鍋嘅靈魂，仲愈煮愈鮮～椰子雞湯湯底奶白色，一上枱就聞到濃濃嘅椰香味，用咗椰肉、椰水、椰奶再加埋雞腿肉煮成，飲落清甜香滑，仲有啲椰汁嘅天然香甜味。配料方面「四面拼盤」有齊蝦丸、墨丸、牛丸同豬肉丸，樣樣都彈牙鮮味。另外醬汁都好有睇頭，例如甜甜辣辣嘅泰式甜辣醬配丸類一流；青檸汁酸酸地超啱食海鮮；至於椒麻豉油就麻香濃郁，配肉類好夾。最後梗係要嚟個甜品完美收尾啦～佢哋嘅招牌椰皇凍真係必試！椰香超濃，口感滑溜，性價比又高，好啱用嚟解辣。
地道港式創意火鍋湯底 美味廚 
圖：一間以創意火鍋湯底同地道粵菜見稱嘅火鍋店，連續13年獲選為米芝蓮指南必比登推介，實力非凡。今年仲推出全新《豐味共嚐》系列，將經典香港美食融入火鍋湯底，創造出令人回味嘅新食法。全港首創嘅碗仔翅湯底，用鮮雞慢熬幾小時，再加入雲腿絲、雞絲、冬菇絲、日本人造魚翅等，味道濃郁，飲一碗就停唔到口。除咗湯底，店內嘅手工丸子同餃子亦相當有特色，好似沙嗲菠蘿牛肉丸混合咗沙嗲嘅香同菠蘿嘅甜味，雪菜火鴨絲餃則鹹香適中，口感爽脆。
城寨主題高質火鍋 城寨煲皇
圖：以九龍城寨做主題，裝修真係好有feel！紅、綠、金色嘅懷舊配搭，加埋霓虹燈、復古舞廳設計，仲有好多懷舊元素打卡位，好似真係返到去70年代嘅城寨咁樣～話明打邊爐，最重要梗係湯底啦，其中沙嗲鍋就係必試，香料調得好有層次，微辣啱啱好；仲有喇沙卜卜蜆鍋，帶椰香又辣又鮮，配埋爽口彈牙嘅蜆肉，成個湯底愈煮愈香。海鮮拼盤又靚又新鮮，包括響螺片、帆立貝、花枝片、基圍蝦等，而牛拼盤入面嘅牛胸爽、牛頸脊肉質細嫩，牛味濃郁。
港泰fusion火鍋店 九五至尊火鍋狗毛
圖：爽蜜蜜
一間將泰式火鍋、地道泰菜同娛樂元素結合嘅特色餐廳，無論係打邊爐、食泰菜定係唱K都一次滿足晒！餐廳裝修豪華大氣，卡位舒適，仲有八間獨立VIP房，嚟家庭聚會、朋友飯局定係一大班人嘅公司活動都一樣啱！湯底選擇多樣化又有驚喜，推介冬蔭功湯底鮮辣酸甜，帶陣陣椰香味；胡椒豬肚湯底則非常惹味，豬肚爽口彈牙。除咗配料仲有泰式小食，如燒牛肉串肉質鮮嫩又惹味；椰汁西米糕椰香濃郁，西米夠甜又滑嘟嘟。
文：Yanica
編：Cathy
