對於鍾意食火鍋又唔想同人爭位、享受獨樂樂嘅朋友嚟講，一人一鍋就最正喇，即睇有咩推介畀大家～
一人一鍋汕頭牛肉火鍋 潮潮居 
潮式一人一鍋你食過未？呢間餐廳推出汕頭牛肉火鍋，主打肥牛、黑毛豬大梅肉同羊肉卷，標榜每日新鮮到貨，肉質鮮嫩、油花均勻。鍋底選擇更加豐富，提供養生真菌湯、潮汕沙茶、大紅辣鍋等六款湯底，無論你鍾意清淡、香濃或者重口味，都可以隨心所欲咁挑選。配菜方面每位食客仲有一盤新鮮嘅蘿蔔、粟米、鮮菇、生菜等蔬菜，健康又好味～
東京過江龍 LE-TA-SU 一人一鍋
圖：來自東京嘅人氣一人一鍋火鍋品牌，呢度主打個人鍋，配合多款湯底同套餐選擇，讓每位客人都可以按自己口味慢慢享受。招牌壽喜燒肩胛肉套餐係必試之選，美國特選安格斯牛肩胛肉充滿濃郁牛味，配搭甜美嘅壽喜燒湯底，再蘸埋生蛋汁，口感更加滑溜。如果你係肉食愛好者，可以試吓「LE-TA-SU套餐」，包括牛肩胛肉、豬肉眼同牛舌，每款肉質都有特色，牛舌特別嫩滑爽口，冇牛腥味，令人驚喜。
棉花糖壽喜燒鍋 温野菜
呢間人氣日式火鍋推出全新壽喜燒系列，包括關西風壽喜燒同關東風棉花糖壽喜燒，味覺同視覺都係一場盛宴！關西風壽喜燒主打傳統口味，店員即席用牛脂開鍋，煎香和牛後加入特製醬油同糖調味，再沾上日本生蛋汁，入口即融，濃郁又滋味。關東風棉花糖壽喜燒，棉花糖放上鍋內，慢慢融化入湯底，將甜味融入牛肉同野菜，非常特別又IG-able！另外佢哋仲有新湯底，包括骨膠原美肌花膠雞白湯同櫻花蝦海苔湯，前者濃郁滋潤，養顏又暖胃；後者湯底清新，帶有櫻花蝦嘅鮮香。
主打北海道黑毛和牛+米豚 狸小路北海道涮涮鍋、壽喜燒、和牛專門店
新開業嘅一人鍋涮涮鍋同壽喜燒專門店，肉類主打「北海道十勝產黑毛和牛」同「北海道米豚」，前者提供A4+赤身、A4+霜降同頂級A5西冷；後者則有豚肩同豚五花部位，照顧唔同人嘅口味。值得留意嘅係，壽喜燒湯底之外，仲有5款每日新鮮製作嘅北海道風味湯底，其中每日限量80份嘅「北海道海膽高湯涮涮鍋」，加入北海道利尻島、羅臼同奧尻地區3款北海道時令海膽，相當鮮味。另外仲有當地人氣嘅傳統湯咖喱湯、牡蠣高湯都好鮮味；如果偏好清甜口味，北海道特選3.6牛乳湯同北海道昆布柴魚湯就啱你喇。
台灣人氣火鍋台 築間幸福鍋物
圖：台灣人氣火鍋品牌，銷量一年高達900萬鍋，香港分店更係首家海外分店！火鍋套餐包湯底、主食、飲品、甜品同任食自助吧，自助吧仲有台灣特色食材，好似蛋餃、甜不辣同米血糕，好吸引～鎮店招牌石頭湯用乾貝柱、魷魚乾、洋蔥、冬菇同蒜頭爆香，再加入柴魚高湯，味道鮮甜濃郁。肉類方面幾推介板腱牛肉，肥瘦分布均勻，肉質軟嫩；另外可以揀海鮮總匯鍋，新鮮又多款式。加埋無限供應嘅飲品同甜品，如阿里山烏龍冷泡茶、冬瓜檸檬茶同焦糖布蕾，完美複製台灣店嘅味道呀！
文: Yanica、Cathy
