好多人對印度菜嘅既定印象都不外乎咖喱同薄餅，其實印度菜仲有好多選擇㗎～西環區最近就開咗間新派印度菜館，由印籍主廚 Taran Chadha主理。Taran由從小喺香港長大，有超過 15 年入廚經驗，亦都擅於融合印度及西方菜式。而餐廳供應嘅菜式元素唔止印度，仲揉合埋尼泊爾、孟加拉及斯里蘭卡菜嘅特色，夠晒異國風情啊！
而講到印度菜都一定會諗起香料，Taran引入多種印度香料，不過佢話注重嘅仍然係食物嘅原味，香料反而係用嚟襯托食物，令食物變得更好味。
芝士怎麼了？($140)
將自家製芝士煎香後，配以羅勒籽、藤蔓番茄、青豆蓉醬及辣香粉調味，外脆內軟，唔會過膩。
加德滿都肉丸餃子(尼泊爾香草雞肉 $140)
加德滿都肉丸餃子係受意大利雲吞啟發，因為印度式嘅餃子其實係無醬汁嘅，但因為Taran平時煮開西餐，就諗到將醬汁加入印度餃子上呢個做法。餃子自家蒸製，總共有四個口味揀， 尼泊爾香草雞肉就最有特色，加入烤野生芝麻肉汁、青蔥同芫茜，味道微辣，香料味恰到好處。
孟加拉椰子開邊虎蝦($325)
呢味菜係受孟加拉菜啟發，河蝦及虎蝦於椰青、芥茉籽、香料、椰子忌廉及法國康堤芝士中烤焗，有陣陣椰香。
印度香料炒蛋全日早餐($155)
印度式All Day Breakfast坊間真係少見啲，未食過真係要試吓佢！All Day Breakfast有辣香粉茶葉煎蛋、印度香料炒蛋、金文拔芝士粒、厚切煙肉、豬肉香腸、炸秋葵條同啤酒烤餅，特別推介炸秋葵條，原來佢係印度常見嘅街頭小食，愈食愈順口啊！成個All Day Breakfast個份量都幾大，兩個人分享就最啱啦～
印度馬沙拉雞絲班尼迪蛋配法式伯納西醬($130)
將水波蛋同辛香嘅咖喱結合，水波蛋流心效果好澎湃，食咗佢呢個就真係perfect brunch囉！
餐廳喺下午三點八點Happy Hour仲會推出$75自選四款手工啤套餐，有成十二款TAP手工啤畀大家任揀，真係好抵飲！
地址: 西環石塘咀南里1號南里壹號地舖
文、相、片: Yanica