食住玩玩住食 Pokemon Go玩家有著數（更新）

呢幾日，全香港無論男男女女大大細細個個都突然多咗份工——小精靈訓練員！自從香港終於玩到Pokemon Go之後，人人都日夜鍛鍊去取勝喇。不過，捉還捉，都要食飯㗎。有餐廳同商場就乘勢推出Pokemon Go玩家優惠，又有得玩，又有得食，Go！！！

食肆篇

Espuma

Photos by expokwan
捉到比卡超或者小火龍嘅訓練員就好啦，可以去返佢哋尖沙咀或者灣仔嘅分店，食返個lunch或者tea，就可以免費升級特飲喇！

為食魚海鮮火鍋專門店

Photos by 美女與野兽
Yo！呢個優惠都好似好易拎，有水系嘅小精靈就得喇！不過水系得嚟，都仲有3級嘅分別嘅，有水箭龜或者鯉魚龍嘅就可以有美國黑豚肉或者肥牛；有金魚王、蚊香蛙或者水伊貝嘅呢就食鮮蝦雲吞、鮮蝦水餃或者韮菜餃啦，而如果得鯉魚王、大鉗蟹或者車厘龜嘅就會送返個雜菜拼盤或者雜菇拼盤。不過一定要訂枱先至有㗎呢個優惠，係捉到嘅就早啲卜位啦。

優惠期：即日起至8月6日

想甜嚐甜

圖：ernest wong
呢間就係早前喺facebook同大家介紹過，喺黃大仙好多款心太軟食嗰間甜品舖呀！所有玩緊Pokemon Go嘅訓練員食甜品都可以有95折，捉到比卡超嘅仲可以再追加指定toppings（OK，開飯仔我仲未捉到比卡超=[），又如果連紅唇蛙都畀你捉到呢，7款心太軟就平5蚊，喺舖頭度捉到任何一隻精靈都有得用12蚊就食到乳酪甜筒連自選配料呀！

優惠期：即日起至7月31日

Pacific Coffee

你哋咁勤力捉精靈，夜麻麻仲喺條街度捉緊，朝早起身應該好攰了吧？去Pacific coffee飲返杯嘢，show返你捉到嘅比卡超，就可以免費升級手調飲品喇！

ICONIC H

喺紅磡或者銅鑼灣捉緊小精靈嘅，不如試下去呢間餐廳度捕獲吖。不過首先你要……買咗隻熱狗，之後如果你喺餐廳入面捉到隻小精靈，再upload埋上facebook/instagram，打返指定hashtag，就可以有客免費烤菠蘿食喇。

北海道牧場

Photos by juanlo
呢個優惠都幾易賺，只要去like佢哋個fb page，同埋將隻小精靈改名做餐廳個名，capscreen之後upload上facebook，就成個主餐牌上面嘅嘢都有9折喇！

發記清水大閘蟹

Photos by Tat Yau (左)、ayniknie （右）
有冇人捉到大箝蟹？趁嚟緊大閘蟹當造，拎住隻改咗名做「發記清水大閘蟹」嘅小精靈去，就可以用9折買「六月黃」大閘蟹喎。正！

優惠期：即日起至8月31日

牛摩

Photos by R.A.W
又係改名就OK嘅優惠。你食緊90分鐘放題嗰陣，like完佢嘅嘅fb page同幫隻小精靈改名做「牛摩」，capscreen upload，就有碟「美國黑毛豬」送返畀你。

商場篇

The One

Photos by tllaw0525
如果你喺The One行行下街，捉到隻小精靈就恭喜你喇，拿拿臨cap低圖再share上fb，打返指定hashtag，就有50蚊美食現金券喇。

優惠期：即日起至7月29日

金朝陽中心

Photos by duckduckchic
喺呢個商場嘅門口或者大堂入面捕獲到小精靈嘅話，like完fb打完卡，就可以有100蚊餐飲禮券，不過每日得20個名額咋。BTW，聽聞嗰度有傻鴨、毒氣丸同比心鳥出現過㗎！

中港城

Photos by 專食CHEAP野既人
聽聞話呢，中港城每日夜晚會放兩個鐘lure module呀，去到捉到指定嘅寵物小精靈，打返張卡，就可以有50蚊Starbucks現金券喇，每日廿個，今日嘅指定小精靈係傻鴨呀！

優惠期：即日起至7月29日（6:30pm – 8:30pm）

文：Kar

隨時接收最新資訊
讚好OpenRice專頁！