青衣10年人氣拉麵店重開 $55粉嫩鴨胸/叉燒元貝拉麵

自從社交平台關注組興起後，有唔少隱世小店被網民力推彈起。好似呢間喺青衣區開業近10年嘅拉麵店，本身位置隱世、只靠街坊口耳相傳，後來獲拉麵關注組成員力推並廣受拉麵迷好評，漸漸成為長龍排隊拉麵店！店舖去年底搬出長康市集，今年1月同區重開，轉戰到長康邨依然未開門已有人龍。

十年街坊拉麵店重開仍保持親民價！

創業難，守業更難，能夠喺飲食界立足10年，相信係實力嘅認證。呢間拉麵店2015年開業，由前身舖仔細細嘅「木屋小食店」做到今時今日新店可以容納約40位食客嘅「木屋拉麵」，人氣不減反增。能夠做到要長期排隊先食到，除咗係左鄰右里食慣嘅味道外，望吓餐牌同出品，你都會搵到答案。

平日中午12點已有大批食客排隊等候入座，可見拉麵店味道有保證

價錢相宜、份量合理、味道食得出心機

餐牌選擇唔多，全店食物只有5款：慢煮叉燒拉麵、慢煮鴨胸拉麵、油麵、牛肉飯同埋玉子燒，不過拉麵只賣$55碗，對比其他拉麵店至少過百嘅定價，價錢真係好相宜。湯底雖然寫有元貝湯、魚乾湯同限定湯共3款選擇，但開張期間貨源不穩，當日去到只有元貝湯供應，拉麵亦係售完即止。

店舖每日中午12點開門，開飯仔平日早上約11:30到埗，已經有約7人喺門外排隊等候，到中午12點排隊人數更多達15人，想食真係建議早啲到。入座後老闆娘會為客人派落單紙，填好就可以等食。由淥麵、煮湯、加醬油、擺碟全程都係老闆同老闆娘二人作業，過程流暢，入座後約10分鐘就食得。

小店一向走親民價錢，開飯仔見到有唔少學生放lunch幫襯

實試$55親民價拉麵+撈麵

開飯仔分別試咗慢煮鴨胸拉麵同油麵。拉麵會跟配一份鴨胸、半隻溏心蛋、蔥同竹筍，以元貝長時間熬煮嘅湯底好清澈，飲落鮮甜順口無味精感，開飯仔最後成碗湯飲晒！麵質比較幼身，但係彈牙有嚼口，同湯底好夾。香港大多拉麵舖可能只有叉燒肉食揀，但係呢度居然有鴨胸拉麵！不得不提鴨胸處理得幾好，肉質粉嫩同時保留到外皮Q彈，入口軟腍唔柴，值得試吓。

元貝湯以鮮甜味為主，飲晒成碗都唔會口渴