葵廣呢間專賣雲石流心蛋糕嘅甜品店，最近搬到尖沙咀啦！地方更大，有粉紅色花牆同座位畀大家坐低慢慢食兼打卡。而除咗招牌迷你雲石流心戚風蛋糕，亦有全新嘅梳乎厘蛋糕同消暑刨冰。想慶祝生日或其他紀念日，仲可以訂特別造型同口味嘅蛋糕唷。
 

Miss Marble新店位於尖沙咀山林道，見到呢幅粉紅花牆就係啦！雖然舖頭唔算大，但都特別擺咗啲枱櫈畀大家坐住嘆甜品，忙裡偷閒一下。
 

堂食甜品推介

雲石流心蛋糕（Twinnings 伯爵茶 $78）

招牌雲石流心戚風蛋糕當然有得留低，迷你版唔洗預訂，面層嘅黑白雲石紋其實係加入竹炭粉嘅棉花糖特製而成，下面就係奶油忌廉，同用低糖配方製作嘅戚風蛋糕，口感鬆軟，甜度適中。流心有Twinnings 伯爵茶、比利時72%特濃朱古力、金莎黑朱古力、炭燒咖啡、伊藤園抹茶牛奶同紫薯牛奶六款口味。
 

開飯仔今次試嘅係人氣No.1嘅Twinnings 伯爵茶，連戚風蛋糕都有加入茶葉碎，紅茶味非常濃郁，帶少少佛手柑清香，平衡返棉花糖嘅甜膩，食完一個都唔覺得Heavy呀。店主亦積極研究新口味，預告定下一個新口味會係最近大熱嘅黑糖珍珠呀！
 

梳乎厘蛋糕（伊藤園抹茶牛奶 $52）

想食平啲啲，就有呢款新出嘅梳乎厘蛋糕，口味比雲石流心蛋糕再多一款海鹽芝士奶蓋。咁咩叫梳乎厘蛋糕？其實係口感更軟嘅戚風蛋糕！難得嘅係保持到蛋糕嘅輕盈彈性，所以雖然無梳乎厘咁入口即溶，但就同樣有食緊一陣微甜嘅風嘅感覺。而日本伊藤園抹茶優點係茶香鮮明而帶回甘，無論係抹茶控定怕太甜嘅朋友都啱食㗎。
 

想消暑嘅話就可以點同樣係新推出嘅火鍋刨冰，特別用打邊爐用嘅銅鍋上，刨冰底係日式細細碎碎嘅口感，上面再加士多啤梨煉奶、清甜菠蘿等配料。可惜採訪當日刨冰機未準備好所以未有得影相同試食啦。
 

滋補養生茶（熱 $58）

飲返杯花茶一樣可以消暑嘅，有凍有熱，不過熱飲就有呢Set超靚嘅粉紅雲石花紋茶杯！唔單止賣相吸引，用嘅茶包亦係歌手鍾舒漫Sherman開設品牌Pistis Life嘅養生花茶呀。總共有五款口味，各有唔同效用。例如呢壺滋補養生茶就有和田大棗、沙漠玫瑰、杞子同紅茶，有助改善血液循環、健腦安神。
 

 
預訂蛋糕人氣款式

夢幻雲石凍餅

甜品店同時亦接受唔同訂單，全部蛋糕取貨當日製造，包括生日蛋糕同散水餅，有唔同口味同尺寸。好似呢個夢幻雲石凍餅仲有唔同形狀選擇，面層係白朱古力雲石鏡面，下面就係芝士慕斯同戚風蛋糕底。
 

圓形高身雲石蛋糕

鍾意雲石流心蛋糕嘅話，除咗可以訂6吋或者8吋蛋糕之外，亦可以訂高身版本。一樣有視覺效果吸引嘅流心㗎。
 

字母蛋糕

普通圓形或者方形唔夠特別，咁就要訂小店嘅字母或者數字蛋糕啦。同樣係低糖配方，上面加上忌廉、士多啤梨同朱古力裝飾，收到嘅人一定覺得Sweet入心啦。
 

雲石流心散水餅

Bite Size版本嘅雲石流心蛋糕，顧名思義畀大家離職嘅時候做散水餅呀！可以揀唔同口味，流心效果唔算澎拜，勝在細細件方便食。
 

Miss Marble
尖沙咀山林道10-12號山林閣地下2C號舖
*堂食每人最低消費$50，預訂蛋糕價錢請向店方查詢

文、相、片：Cathy