小朋友最怕悶，嚟自台灣親子餐廳嘅大樹先生的家最近就同台式飲品店花斑茶社合作，以「珍珠奶茶的異想世界」為題。而家去大樹先生的家銅鑼燒店唔單止可以飲到花斑茶社特別設計嘅Babyccino同一系列招牌飲品，仲特設黑糖珍珠奶茶波波池等遊戲區，有得玩、有得飲，仲有得食！
 

花斑茶社用嘅係100%台中原產地直送原片茶葉，黑糖珍珠亦係用日本同台灣黑糖粉100%手工現炒，無論係茶葉定珍珠都唔會加任何防腐劑或者添加劑，各位爸爸媽媽就可以放心畀小朋友飲啦。而大樹先生的家銅鑼灣店以Next Generation為主題，有機器人區、磁鐵布積木區等。
 

今次聯乘更特設黑糖珍珠奶茶波波池，將花斑茶社最受歡迎嘅黑糖珍珠變成令小朋友樂而忘返嘅波波池！記得影相「打卡」之餘，各位家長絕對可以放心，波波係會用專門研發嘅洗球機定期消毒。
 

珍珠奶茶遊戲區仲包括黑糖珍珠水池、煮飯仔區，最啱畀小朋友自由自在咁任玩「放電」呀。特別係水池可以畀小朋友親自接觸唔同材質，同感受水嘅浮力，一邊玩一邊訓練觸覺。
 

Babyccino（芝士奶蓋可可鮮奶，大樹先生的家限定）

花斑茶社今次亦特別設計呢杯Babyccino，以明治4.3鮮奶調配可可鮮奶，加上用澳洲芝士打成嘅芝士奶蓋，最後以Oreo碎點綴。甜味適中唔會太膩，最重要係唔係用奶精或者奶蓋粉開出嚟，飲都飲得安心啲吖嘛。
 

黑糖珍珠厚鮮奶

品牌最受歡迎嘅黑糖珍珠系列當然亦有得飲，黑糖珍珠係人手每日鮮炒，粒粒香甜煙韌。加上厚滑嘅明治4.3鮮奶，啖啖滿足。
 

黑糖珍珠烏龍奶茶

呢杯黑糖珍珠烏龍奶茶就加咗烏龍茶，選用台灣黃金烏龍茶葉，屬於中度烘焙，味道唔會過於厚重之餘，香醇嘅回甘令奶茶飲落濃而不膩。
 

台式珍珠肉燥飯

黑糖珍珠除咗加落飲品，仲可以變成菜式？餐廳特別設計台式珍珠肉燥飯同珍珠麻婆豆腐兩款玩味主食，正宗台式肉燥飯加上彈牙珍珠，口感無想象中咁違和，味道就以肉燥鹹香為主。
 

開心咪咪配天婦羅炸蝦

螃蟹寶寶配照燒雞扒

兒童套餐唔單止造型可愛，餐廳亦特別以少油少鹽嘅烹調方式，將多款蔬菜碎融入主食當中。小朋友食得開心，爸爸媽媽見到小朋友食多啲蔬菜同樣開心。
 

低溫特製手撕雞肉配四色糙米飯

新鮮雞肉以低溫浸熟再以冰水冰鎮，保持雞肉原汁原味同嫩滑口感。加上少少椒鹽同麻油提香，鮮味十足。而糙米飯就糅合糙米同美國野米，膳食纖維高，更有豐富營養素同礦物質。
 

大樹先生招牌四季拼盤

一份有齊雜菌照燒牛柳粒、明蝦牛油果蔬菜冷春卷、日式芝士味炸蝦丸。雜菌照燒牛柳粒特別選用口感柔嫩嘅牛柳，加上綜合野菌同特製照燒汁，特別香口。冷春卷以爽滑涼皮包住牛油果、蝦，同蔬菜，色彩繽紛，加上酸酸甜甜嘅泰式醬汁，健康而且無負擔。日式芝士味炸蝦丸外面金黃香脆，一咬開就係彈牙蝦肉同香濃芝士，大小朋友都會鍾意。
 

傳媒體驗日更安排調配飲品體驗，小朋友同家長可以動手調配自己嘅Babyccino

大樹先生的家X花斑茶社
銅鑼灣告士打道311號皇室堡15樓1501-1505號舖

文：Cathy
相、片：Calvin Kwok