大食仔幾時都係食放題至抵。銅鑼灣最近有間新晉嘅日本和牛放題餐廳，120分鐘任食嘅唔淨止係和牛燒肉，仲有一系列嘅和牛料理，CP值破表！

餐廳老闆喺日本岩手縣設有自家農場，養殖黑毛和牛。頭半年以草餵飼，之後再用威士忌酒嘅hop去做飼料，令到牛肉肉色會紅身啲靚仔啲。農場每月約可供應80-100隻牛，當中有大約十零二十隻會運送到港，所以有啲坊間少見嘅稀有部位，都可以喺度搵到，仲可以放題任食！

「尊貴日本和牛放題套餐」包括咗9-10款分別嚟自熊本、同岩手嘅A4/A5和牛燒肉（視乎供應情況），牛肩胛、牛頸脊、牛五花、牛小排、牛冧、稀有汁燒千本筋、牛肩梅花、後腰肉、牛肋條同埋一口和牛都有機會食到。餐廳首先會成set出嚟，試晒每個唔同部位後，就可以隨意追加自己喜歡嘅部位。

 牛小排

其中牛小排入口即溶，係最多人encore嘅部位之一。較少見嘅千本筋，係近牛𦟌位置，肉質較有彈性，配搭師傅特別調校嘅燒汁特別有肉香。

 牛五花

牛五花油花豐富，燒完食啖啖油香。 而牛肩梅花則係前肩交界嘅位置，肉味濃郁。 鍾意有嚼勁啲嘅朋友仔，牛頸脊同牛冧就應該係你哋嘅心水嘞。

除咗各款燒肉外，套餐仲包埋一系列嘅和牛料理。特別推介A5熊本黑毛和牛玉子燒，輕輕燒一燒和牛後，再蘸點日本蛋汁，蛋香滿滿得嚟，和牛仲要滑身咗。

飛驒牛刺身未食都睇得出新鮮，肉色鮮紅，點一點特製酸汁更能突顯肉香。不過如果怕太生嘅朋友，都可以輕輕焫一焫嘅。

黑松露燒牛肉他他以安格斯牛製作，底下置有調製過嘅醃洋蔥、黑松露同葱花，一啖放入口，慢慢感受唔同層次嘅香味。

不得不提嘅仲有溫泉蛋紫菜醬油牛川飯，呢個飯特別在於師傅自家提煉和牛油脂製作，令炒飯帶有微微甘香味道。

 原隻龍蝦刺身船提前兩日預訂可免費享用（優惠期至9月30日）

牛川日本和牛專門店  
地址: 銅鑼灣謝斐道496號金利文廣場3樓

文：Kar
相、片：Wilfred Chui