又到一眾酒迷最期待嘅 10 月份呀！喺 Oktoberfest 期間，好多餐廳或酒廠都會舉辦唔同嘅啤酒節活動，今年介紹四個大型啤酒節畀大家，快啲約朋友啤啤佢～

目錄

啤酒遊樂園  糖廠街市集

每年都唔會缺席嘅糖廠街市集，今年匯聚 15 間本地啤酒釀酒廠一共逾 70 款啤酒口味，當然唔少得多款配酒嘅美食啦～今年亮點係 BREER 釀酒廠，佢哋採用麵包店剩餘嘅麵包代替大麥，自家釀製出獨一無二嘅啤酒，例如呢款班蘭奶昔 IPA，班蘭香氣好自然帶淡淡甜味。另外仲有釀酒界先驅 Young Master Brewery、本地釀酒廠 Deadman Brewery 同以英雄精釀啤酒為宗旨嘅本地釀酒廠 Heroes Beer Co.！食物方面有黑啤及味噌燉牛肋骨、紫菜味雞翼、香口沙爹串燒及龍蝦包等，好啱送酒呀～
 

地點：鰂魚涌英皇道 979 號太古坊二座太古公園
日期：2023 年 10 月 12 日及 13 日（星期四及五）下午 6 時至 10 時，2023 年 10 月 14 日（星期六）下午 12 時至 4 時，下午 6 時至 10 時
價錢：$320／位（太古坊商戶）、$380／位（公眾，網上購票輸入優惠碼「EXCLUSIVE10」可享九折優惠）

Oktoberfest 慕尼黑啤酒節  INK Cafe

如果想享受節日狂歡氣氛呢個啤酒節就最合適不過，可以喺沿海露天星空下享受各式德國傳統美食及手工啤酒，仲有手風琴同銅管樂器現場演奏，每人包括多款德國美食及2杯手工啤酒～精選啤酒有香港精釀啤酒 H.K. Lovecraft 嘅 Vienna Amber Lager 手工啤及 King In Yellow Helles Lager 手工啤，精選傳統德國特色麥芽釀製，味道豐富且暢快清爽。食物就有椒鹽脆餅麵包配啤酒芝士醬、自家製豬肉腸薯條配手撕豬肉及芝士咖喱番茄醬及煙燻豬五花薄餅、洋蔥、法式鮮忌廉及藏茴香等～
 

地點：尖沙咀梳士巴利道 10 號香港藝術館 G 樓
日期：2023 年 10 月 13 日星期五，晚上 8 時 30 分至晚上 11 時
價錢：$480／位

將軍澳德國啤酒節  PopWalk天晉滙

呢個活動特別同德國餐廳 Das Bier 及擁有 380 年歷史嘅知名德國啤酒品牌 Paulaner 合作，共同打造首個將軍澳德國啤酒節！引入品牌其中四款極具代表性嘅啤酒種類，包括擁有帶果香味嘅 Weissbier Naturtrüb；帶強烈麥芽及熱帶水果香味嘅 Weissbier Dunkel；入口柔和順滑嘅 Weissbier Hell 及壓軸嘅 Oktoberfest Bier。另外仲有經典嘅德國美食如香腸酸菜拼盤、德國咸豬手薯仔沙律酸菜及德國傳統大蒜薯蓉湯等。以為啤酒節淨係大人先有得參與？呢度連小朋友都有嘢玩，包括三個經典啤酒節遊戲、面部彩繪及德國傳統啤酒節服飾體驗，啱晒一家大細去玩！
 

地點：將軍澳唐俊街 28 號 Ocean PopWalk 海天晉滙地下長廊及中庭
日期：即日至 2023 年 10 月 29 日 （逢星期六、日及公眾假期）下午 4 時至晚上 10 時

頭搖又尾擺節  YOHO MALL x 香港手工啤協會

可以帶埋竉物去嘅啤酒節你又去過未？元朗呢個啤酒節齊集近 100 款唔同口味本地手工啤、特色啤酒及寵物啤，口味出奇得意夠獨特。創意口味如「芒椰奶西」及「竹蔗茅根啤」，亦有以「雜果賓治」為主題，以及以市面少見加入水果釀製嘅手工啤。仲有為愛犬而設，成分不含酒精同汽泡，而且散發住雞肉同牛肉香味嘅寵物啤酒，主子都可以同主人一齊同「醉」！當然唔少得好玩嘅好玩嘉年華遊戲、啤酒、萌寵主題文創精品同埋「Tap & Chill」休閒區等你同寵物一齊 Chill 住過～
 

地點：元朗朗日路 9 號形點 YOHO MALL I 中庭
日期：即日至 2023 年 10 月 23 日，上午 11 時至晚上 10 時

文: Yanica