未到中秋就講哈囉喂，會唔會太快？唔會呀，因為下星期迪士尼就已經開始有「詭屋」玩喇~ 想搭早班車去玩嘅貪玩鬼，係時候約定friend子啦~ 咁啱今年原來係《怪誕城之夜》上映25周年，咁就梗係要嚟做主題啦。玩前玩後要醫肚？成個樂園間間餐廳都有特色嘅哈囉喂套餐同嘢食，為食鬼唔使怕餓，行到邊，食到邊絕對唔係問題。

戶外小食亭

好多人都鍾意食雞蛋仔，入到嚟樂園一樣有得食！黑芝麻雞蛋仔用米奇杯裝住，可以邊行邊食。仲有大大塊嘅阿Jack棉花糖曲奇。而綠色呢杯綠魔特飲，就係芒果汁加菠蘿汁等調成嘅，酸酸甜甜，個燈泡仲會著燈添㗎，夜麻麻射啲綠燈出嚟都咪話唔詭異！

大街餐廳

想坐定定食哈囉喂大餐嘅，有大街怪誕套餐。包括牛仔柳薄片露筍沙律配芥末油醋汁、南瓜燉雞伴三文魚露筍卷配紅菜頭檸檬泡沫，同朱古力慕絲配紅桑子。全部擺盤都好有心思，細心望會發現紅菜頭化身成小鬼樣，好啱打卡。而朱古力慕絲亦唔會話太甜膩。

皇室宴會廳

甜品控就要嚟呢度啦~ 焗木乃伊玉桂蘋果批啦、阿Jack綠茶紅豆雪芳蛋糕啦、朱古力慕絲啫喱啦，全部嘅造型都好鬼CUTE CUTE，仲有得落手落腳DIY阿Jack曲奇添~ 嗱，白朱古力同朱古力醬仲有塊餅都畀齊你，隻阿Jack變到咩樣就睇你造化啦~

酒店區

一家大細想玩盡佢嘅仲可以去埋酒店住添~ 有哈囉喂主題房，仲有米奇米妮曲奇送添。不過就算唔住酒店，都可以過去酒店餐廳嗰邊搵食嘅。

星航圖咖啡廳

呢個南瓜米奇造型真係好鬼可愛，原來係芒果牛奶朱古力慕絲蛋糕嚟，嗚呀，真心唔捨得一刀拮落去切開佢囉……

芊彩餐廳

阿Jack香草奶凍配時令野莓都好得意，酸酸咪咪咁幾醒胃。仲有杯紳士阿Jack朱古力特飲。

晶荷軒

難得一場party，阿Jack又點會淨係進駐西餐吖~ 中菜廳一樣有佢嘅蹤影。三款 的的式式嘅點心包括阿Jack蝦餃、南瓜海鮮酥同木乃伊素菜包就係中餐嘅代表啦。

米奇廚師餐廳

心思思想大顯身手嘅朋友仔，機會嚟喇，呢度有個自助晚餐連親子曲奇DIY，畀晒食材同材料你，可以自己親手整返幾塊屬於你哋嘅哈囉喂曲奇~

河景餐廳

 怪誕特飲

大冒險家餐廳

 甜蜜噩夢

 當然唔少得好多精品賣啦~

講多樣嘢你哋聽，而家仲可以喺中環碼頭搭船入去迪士尼添~ 船程廿分鐘左右，不過只得去程，回程就要搭返陸路嘅交通工具啦~

哈囉喂美食期間限定：9月13 日 – 10月31日

文、相：Kar