想開始一場充滿視覺及味覺嘅享受，佐敦呢間全新嘅主題火鍋店絕對滿足到你！呢間火鍋店以50年代舊香港風為主題，重現昔日華人洋行氛圍，餐廳足足用咗1200萬打造，真係可以堪稱為全港最豪華嘅火鍋店！品牌取名為「香江花月」其實暗藏兩個唔同意思，除咗訴說昔日50年代舊香港五光十色嘅文化外，最特別係火鍋以鮮花入饌，將繁花盛放嘅主題融入火鍋湯底中，務求令客人有更新鮮嘅火鍋體驗。
淨係打卡位都已經多到數唔晒，好似等候區咁，係一條好夢幻嘅泡泡時光隧道，唔講以為去咗TeamLab；另外仲有由多部古董電話組成嘅牆身、藥材舖嘅百子櫃子戥秤、雜貨店嘅滑輪、舊米舖嘅稱陀、當時盛行嘅打字機及留聲機等，充滿舊香港情懷～
招牌牛乳玫瑰鍋（$168/鍋）+香江拼（$788）
食物方面一樣夠晒睇頭，好似呢個牛乳玫瑰鍋+香江拼，香江拼其實即係牛肉拼盤，有和牛牛柳粒、安格斯牛、牛胸油、牛𦟌、牛心椗、牛柏葉及牛脷等。最特別係會以原木圓盤奉上，將各款牛肉捲成花朵般，好有心機，絕對適合各位foodie相機食先！
招牌牛乳玫瑰鍋選用日本北海道全脂牛乳配上來自日本嘅玫瑰烹煮，有濃郁牛乳香氣之餘帶有淡淡玫瑰花香，層次感豐富。
更多【新店直擊】： |
金泊清酒海鮮鍋（$368）
日本清酒一向甜度同酸度恰到好處，最適合同海鮮如鮮蝦、蟹及蜆同煮。金泊清酒海鮮鍋首先以大廚秘方爆炒，配以紐西蘭牛油、洋蔥及蒜頭等令海鮮逼出鮮味，隨後加入清酒湯底一同熬製，有濃郁酒香之外味道仲好鮮甜。最後仲會喺面層灑上奢華嘅金箔，即刻高級咗！
自家製三色墨魚丸（$78）、三色餃（$88）
自家手打墨魚丸，有鹹蛋黃、黑松露及蟹籽口味，口感彈牙。而三色餃只會喺收到客人柯打後即包即出，包括黑松露長腳蟹餃、芝士鮮菌餃及野生松茸餃，鮮味十足。
冬甩墨魚菓子（$78）
以墨魚及蝦製成嘅兩款冬甩墨魚菓子，除咗食得出本身墨魚粒粒，仲加入杏仁及腰果，口感香脆彈牙。
鳳琉香（$68）、瑰洛月（$68）
鳳琉香以自家製嘅菠蘿味糖漿配以干薑水，仲有一個香味波波於杯頂上製成煙霧彌漫效果，打卡一流！而瑰洛月則以洛神花玫瑰蘋果等材料製成糖漿，製成玫瑰型紅色冰花，以確保唔會因冰塊而令飲品味道變淡，帶有清新消滯功效。
地址: 佐敦佐敦道35號百誠大廈2樓
文: Yanica
相: Tom Li
