明明阿媽教落，未食五月糭，寒衣勿入籠。之但係今年糭都未食就已經酷熱天氣鳥......BTW，今年啲糭出咗唔少新口味，仲多咗啲「營養豐富纖維高」嘅素糭𠻹～邊睇邊揀邊換季啦~
足料代表 原隻鮑魚裹蒸糭 逸東軒
裹蒸糭絕對係糉界嘅足料代表！傳統嘅裹蒸糭梗係唔少得邪惡嘅鹹蛋黃、大花菇同瑤柱啦，再加埋原隻鮮鮑魚真係大滿足。咁大隻裹蒸糭記得唔好獨食，要開心share喎！
日系朋友 十勝紅豆栗子十穀粽 紫粵軒
綿密嘅北海道十勝紅豆、香甜嘅栗子、口感夠晒豐富嘅十穀米，連養生嘅茨實、蓮子同紅薏仁都有，再加上清香嘅桂花糖漿，呢隻甜糭真係纖維豐富，營養「爆燈」！
極邪惡x極healthy 梅菜紅燒肉糭 奇華餅家
呢兩款全新嘅口味，分別係變「糭」嘅梅菜紅燒肉同蜜棗栗子麥米素糭。前者將經典菜式化身成糭，而且仲保留埋肉汁多、梅菜鹹香嘅特色。後者入面有superfood紅藜麥、有機燕麥米，配上原粒栗子同蜜棗，係素食者同健康之選～
矜貴燕窩糭 九龍維景酒店
創新嘅「燕窩桂花紅豆糭」加咗矜貴嘅燕窩係入面，燕窩同桂花一樣都係「清甜」嘅代表，加埋軟糯嘅紅豆，甜度剛剛好，唔會太死甜。
想食得健康都可以好刁鑽㗎！好似其中新登場嘅松茸桂圓薏仁素糭，用咗勁香嘅雲南松茸，仲有靈芝菇同香菇醬，鍾意食菇嘅就啱晒。而黑松露雪蓮五穀糭 就有五穀米，加上煙韌嘅雪蓮子同勁濃郁嘅黑松露醬，仲唔邊食邊養生！
三心兩意一口純素糉 Green Common
一直推廣綠色飲食嘅Green Common再次推出自家品牌純素糉，而呢set「三心兩意一口甜糉」就包括傳統鹼水豆沙、飲食界得寵嘅椰香紫薯、仲有望到都覺得清新嘅綠色斑蘭栗茸口味，每隻都只係100g，可以一啖一隻，完全唔heavy。
菌香＋果香 養生姬松茸、黃金柑桔糭 翠亨邨
繼續都係健康推介，呢款兩款姬松茸百味糭同黃金柑桔糭都係素糭嚟㗎。百味糭有藜麥、好少見拎嚟做糭嘅鷹嘴豆、姬松茸、蟲草花同提鮮嘅昆布。而柑桔糭就係用咗自家製柑桔蓉同糖柑桔整成，食嗰時仲可以配上柑桔醬，淡淡果香夠refresh！
豪華享受 黑豚腩甘栗、黑松露佛跳牆糭 九龍香格里拉大酒店香宮
西班牙黑豚腩甘栗糭由西班牙栗飼豬整嘅腩肉，加上栗子製作，啖啖豬肉同栗子嘅甘香。而黑松露佛跳牆糭就係中西合璧crossover嘅口味，而且揀嘅都係頂級靚料。海參、花膠、瑤柱及雲腿，加埋意大利黑松露，簡直係豪華級享受！
文：Yanny