以飯局約會地點嚟講，西營盤未必會係最熱門嘅地區，不過其實呢個小區，唔聲唔聲咁收埋咗唔少特色嘅餐廳架。加上區內有多幢壁畫牆身，閒時過嚟擺拍下、影下靚相之後，都可以發掘下區內嘅美食。今次同大家介紹嘅兩間餐廳，環境舒服，好啱小聚！

Flying Pig Bistro （西營盤）　　

餐廳以藍色為主調，木系嘅裝修、牆身壁畫畫滿一隻隻可愛豬仔帶畀人一種輕鬆舒服嘅氣氛，不論係同另一半定係朋友嚟食都好啱feel。主打各式嘅肉類，當中又以豬肉為主，主廚擅長創作fusion菜式，配搭頗有新意。

羊肉威靈頓 Lamb Wellington

新出嘅羊肉威靈頓，係食開嘅威靈頓牛排變奏。外層嘅酥皮輕輕烤至金黃色，口感酥脆，包住軟腍入味嘅羊肉，夾埋茄子、菠菜墊底，層次變得更豐富。自家調製嘅醬汁亦充滿誠意，師傅特意加入羊汁同Rosemary wine，增加香氣。

豬肉拼盤  Pig Platter

呢個Platter夠晒開心，匯集咗多款豬肉菜式，包括味道鹹香嘅自家製嘅豬肉腸、香甜惹味嘅慢煮ribs，同埋富有既juicy又有泰式風味嘅豬臉頰肉。另外搭配烘酸種麵包、捲心菜、同茄汁豆等等配料，一次過滿足晒多個願望。

炸豬扒  Schnitzel Pork

鍾意脆口嘢嘅朋友仔，推介炸豬扒畀你哋先。餐廳選用嚟自北海道嘅豬肉，肉質軟嫩。最抵讚係炸粉唔厚，又唔會炸到好乾，薄薄一層，香脆可口，佐酒一流。

蟹肉意粉  Typhoon Crab Truffle Pasta

擺碟配搭帶種隨意感嘅呢碟意粉，食落又幾有驚喜。意粉彈牙有嚼勁、啖啖蟹肉不在話下，而且喺蒜香、微辣嘅味道中，仲隱約食到甜甜地嘅酒香，原來師傅製作時真係有加入少量嘅酒呢。

Piggy Breakfast 

呢區比較少餐廳早開門，所以如果想話要食個豐富啲嘅早餐或者Brunch嘅話，可以諗諗呢度呀。每日9點開始就會有brunch供應，要特別一提嘅係，比起食開嘅all day breakfast，除咗煙肉、腸仔、蕃茄、蛋同薯餅等之外，呢度仲多多塊扒添啊！夠晒豐富！

Lobster Shack（西營盤）　

呢間餐廳可以話專為龍蝦迷而設，成份menu大部分嘅菜式都係龍蝦料理，原隻燒又有，搭配唔同食材創作又有。不過點整都好，餐廳都主張以最少嘅調味料去處理，希望可以盡量畀客人食得到龍蝦原有嘅鮮甜味道。餐廳選用新鮮空運到港嘅加拿大波士頓龍蝦，質素有保證。

燒龍蝦  Grilled Lobster

坐喺吧枱望住燒龍蝦嘅過程，未上枱就已經首先食指大動。原隻龍蝦開邊，以蒜、檸檬、牛油作簡單調味，火喉控制啱啱好，面層帶有微微焦香，肉質扎實，依然爽彈。

Lobster Mac & Cheese 

龍蝦mac & cheese以車打芝士同巴馬臣兩種芝士製作，熱辣辣上枱嗰陣更有拉絲效果，絕對係芝士控嘅飛佛，啖啖都係濃郁嘅芝士鹹香。而且仲相當足料，除咗面頭嘅龍蝦鉗肉外，芝士通心粉中間都藏有唔少龍蝦肉架。大大份，好啱share。

龍蝦包Lobster Roll 

身為稱職嘅龍蝦迷，一定喺唔同地方食過好多龍蝦包。呢度嘅龍蝦包亦有驚喜，將鮮爽嘅龍蝦肉切粒，再混入蔥呀、西芹粒呀等蔬菜同沙律醬，以鬆軟嘅麵包夾住，幾fresh。比起坊間食到嘅少咗一份膩感，而多咗一份小清新。

燒龍蝦尾Grilled Lobster Tail

調味同燒龍蝦大致相同，不過size就係加大版。龍蝦尾啖啖肉，香口得嚟仲有陣陣鮮甜。同時配埋沙律同薯條，係滿足啊。

Lobster Benedict

為咗全面照顧龍蝦迷嘅需要，weekend仲會有brunch供應。一起身就有龍蝦食，心情都好啲。呢個係豪華版嘅egg benedict，底層放上爽口嘅龍蝦肉，淋埋自家調製嘅荷蘭醬，最重要係生熟度控制剛好嘅水波蛋，拮一拮流埋啲蛋汁落去，層次立馬再豐富咗。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異