可能連西營盤嘅街坊都未必知，第二街街口轉角開咗間居酒屋，刺身壽司串燒當然唔少得，而佢哋嘅招牌菜係唔算好多地方有得食嘅黑咖喱，但講到重點，生蠔應該走唔甩，仲要10蚊，大大隻！

日本嘢魚生係基本，呢度嘅時令刺身，每日都會由日本直送，但佢哋又不甘平凡，於是，呢道薄切左口魚，唔點豉油，就改為配上自家製嘅梅汁。酸酸咪咪咁作為前菜幾開胃。

火炙刺身丼一碗有三款刺身，包括蒲燒鯛魚、左口魚同三文魚，上菜前輕輕用火槍燒過，有微微焦香。鯛魚油脂頗香，肉質鮮甜。Lunch食一碗都幾滿足。

居酒屋梗有串燒，推介燒雞翼、牛小排、京蔥雞肉，全部都燒得幾香口，佐酒一流。另外女生鍾意嘅迷你甜薯都真係好迷你，好甜心下。

鍾意食魚嘅朋友就要試下喜之次一夜干啦，百零蚊呢個價錢唔算貴。條魚以各種調味醃過後再進行風乾，魚皮燒到脆脆地，有鹹香，而魚肉則比較結實。

至於招牌黑咖哩吉列豬扒飯，話就話係咖喱，但係唔辣嘅。黑麻麻係因為加咗墨魚汁，師傅另外仲加咗啲蝦殻去製作，令到汁底甜得嚟仲帶有鮮味。唔止咁，細心食嘅話你仲可能會食到粒粒蘋果粒，原來真係有加埋啲生果粒入去呀。師傅解釋話咁樣可以更加突出咖喱味道，多多種層次喎。係幾特別嘅，其他地方好少食到，送飯都幾啱。每日限量賣15碗咋！

最值得期待嘅當然係呢隻10蚊嘅生蠔啦，大大隻，任叫唔嬲！今次呢批就係嚟自法國嘅，即叫即開，口感軟滑，好開心呀科科。

東鮨居酒屋
地址：西環西營盤第二街1-11號東祥大廈低層地下E號舖

文、相、片：Kar