好多時去食日本菜，裝修都係偏向日式居酒屋懷舊風或日式摩登風，但上環新開呢間就唔同啦，餐廳走嘅係英國式莊園風，唔講真係以為自己去咗食三層架Afternoon Tea啊！不過呢度就無Tea食，餐廳主要供應傳統日本菜，不過唔少菜式都加入咗獨特元素～

龍蝦天婦羅($420)

特製炸漿酥脆之餘不油膩，一啲負擔感都無。而且雖然係炸物，但仍然食得出龍蝦鮮甜味，肉質彈牙，配埋日式芥末醬食味道又多個層次。

原隻烤雞飯($260)

原隻烤雞內包上榛子、飯、磨菇及煙肉烤薑醬，飯吸收晒雞油，有陣陣雞油嘅香氣。至於烤雞夠滑，而且皮薄唔油。

切開烤雞後會見到滿滿嘅飯，熱辣辣食最過癮。

原條鱸魚($380)

鱸魚先鋪上昆布、青葱醬及芝麻油，然後再包裹上一層厚厚嘅海鹽再拎去烤焗。咁做可以令鱸魚有鹹香外仍能保持魚味，鍾意口味重啲嘅朋友，可以配埋照燒醬油試試。

西蘭花苗天婦羅($80)

呢種菜嘅外表十足十西蘭花，但長版嘅西蘭花你又見過未？其實佢就叫西蘭花苗，係一種西蘭花同芥蘭嘅混種，味道都同樣有少少西蘭花同芥蘭味，好有趣！

藍鰭金槍魚($180)、素食蕃茄水果($130)

呢兩款都係開胃菜，藍鰭金槍魚用咗羅勒、紅蔥、柚子醬油同日式脆米球，新鮮外口感豐富。素食蕃茄水果加入柚子啫喱，酸酸地食主菜前食就最啱。

Honjo   

地址: 上環皇后大道西77-91號荷李活中心1樓

文、相、片: Yanica