身邊有無啲朋友成日舉棋不定唔知食咩好或者係貪心鬼咩都想食？咁荔枝角呢間餐廳就啱晒大家，餐廳由西餐廳轉型至賣泰國同西式菜，無論係傳統泰國菜抑或泰西fusion菜都有得食，而且最特別係餐廳嘅炸薯條有30種味調味粉揀，薯條控一定要去試勻佢！
香煎比目魚配檸檬牛油汁
師傅先將比目魚炸五分鐘，令到魚肉無咁容易散開，之後先拎去煎脆個皮。魚肉嫩滑多汁，魚味重。配上自家製檸檬牛油汁，味道酸酸地好開胃。
牛油果軟殼蟹米紙卷
引入一種較高價嘅米紙卷，質地特別煙韌。米紙卷內有新鮮牛油果片同軟殼蟹，軟殼蟹先炸後焗，外脆內軟夠晒多肉。泰式醬汁都係師傅自行調配，泰式醬加入檸檬、青椒及辣汁，味道更酸更辣。
牛肝菌野菌意大利飯
呢個意大利飯可以話係師傅最拿手菜式，用牛肝菌、蔬菜高湯及牛油煮成。牛肝菌味香濃，素食者只要走牛油都可以食㗎！
泰式春卷
春卷內有芋頭、紅蘿白、洋蔥、西芹及菜菇等材料，先將餡料炒香，再用網狀外皮包，口感鬆脆唔油膩。
泰越小食拼盤
小食拼盤包括蝴蝶蝦、蔗蝦、雞翼及春卷。雞翼炸漿同樣係自家製，炸漿內加入啤酒，雞翼外皮會更加鬆脆，而且肉汁豐富。
炸薯條
另外餐廳嘅炸薯條係有30款唔同口味嘅調味粉揀㗎！如蒜香、紫菜、抹茶、芋香、泡菜及麻辣等，而且越叫會越平，第一碟$45，第二碟$35仲送兩枝手工啤，第三碟$25，第四碟只係$15再送多兩枝啤，叫碟薯條同朋友傾偈飲返杯就啱晒！
地址: 荔枝角長順街15號D2 Place二期1樓110-111號舖
文、相、片: Yanica