荃灣驚安の殿堂Food Court開幕日本拉麵+章魚燒+和牛專門店進駐

一眾Donki粉期待已久嘅畫面要出現喇！全港最大嗰間驚安の殿堂（荃灣店）嘅food court終於開幕喇，有6間人氣餐廳進駐，包括有拉麵、沾麵店、章魚燒等：

原味正宗章魚燒、玉子照燒醬章魚燒

呢間人氣章魚燒店喺日本有超過400間分店，基本上成日返鄉下嘅朋友就算未食過都實認得佢。一粒粒外皮鬆脆，內餡軟滑嘅章魚燒，大部分材料都嚟自日本，淋上醬汁同木魚絲，相當吸引，中間仲要有大大粒約6-7gram嘅八爪魚粒，絕不欺場呢。

紅豆鯛魚燒外層酥脆，淋埋楓糖醬令整體甜度大增。

開幕優惠：可獲雙倍印花

招牌鹽味拉麵 山頭火

鹽味拉麵、特製豬頸肉豉油拉麵

源於北海道旭川嘅拉麵店，以湯汁作為品牌嘅賣點，最初單賣鹽味拉麵起家，而家已經發展至醬油、味噌等多款口味嘅拉麵同沾麵都有售。招牌鹽味拉麵湯底以豬骨、魚乾等熬製而成，濃郁得嚟又唔會太鹹。麵條亦可自由選擇軟硬度。

開幕優惠：所有麵食減 $5

芝士控最愛 北之坂

芝士焗意大利肉醬千層麵、芝士雞肉焗奄列飯套餐

抹茶意大利芝士蛋糕

想食日式西餐嘅朋友，呢間就啱晒喇。餐廳以日式食材，提供多款意粉同焗飯，醬汁亦係店方自家製作呢，芝士焗意大利肉醬千層麵使用mozzarella芝士，成層金黃色嘅軟滑芝士鋪喺面，趁熱食分分鐘仲可以拉到絲添！另外可以加配口感軟滑嘅抹茶意大利芝士蛋糕。

開幕限定套餐：芝士焗吉列豬扒飯（咖喱汁）+雜錦沙律+忌廉粟米湯 $70

獨家限定優惠 Pepper Lunch

一口牛扒（加配芝士）

一向都廣受歡迎嘅呢間鐵板牛肉飯餐廳，繼續都係會供應多款鐵板餐，以急速加熱至260度嘅鐵板，鎖住肉汁，再搭配秘製胡椒黃油同醬汁，即方便又惹味。

開幕限定套餐：黑椒牛肉飯+特選三拼+2杯汽水 $123

再度回歸 麵屋哲（快將開幕）

沾麵控或者會對呢間沾麵專門店有啲印象，冇錯，就係嚟自日本，早年亦曾喺銅鑼灣開過分店嘅つけめんTETSU，今次再度回歸，簡直係沾麵控嘅福音。湯頭以豚骨、鰹魚乾等熬製，層次豐富，味道香濃，而且仲會將熱石直接放入湯中，令湯底一直保持熱力，好窩心！

牛魔王召喚 Beef Mania（快將開幕）

牛魔王想食就要期待多陣喇，呢間主力提供日本優質和牛嘅餐廳聽日就未開住嘅，但佢哋嘅極上和牛丼、牛舌丼、西冷牛扒丼同自家製牛魔王烏冬等，都好吸引呢。

文：Kar
相、片：Tom Li