中環區都有得掃吓街食港式街頭小食？無聽錯啊！中環擺花街開咗間新港式小食店，佢係李好味嘅姊妹店，無論裝潢定食物都延續玩味風格。裝潢以紅綠色為主調，當眼處掛咗吉祥物小醒獅，以紅色大鼓代替餐枱；另外主打港式街頭小食，全部小食都加入玩味元素，包你一定無見過！
花膠碗仔翅($48)
碗仔翅就食得多，加入花膠嘅又食過未？呢度嘅碗仔翅可謂真材實料，入面有花膠、冬菇、木耳絲及竹笙，湯底仲以鮮雞殼及雞腳熬製而成，甘香味濃，係豪華版碗仔翅啊！
松香芝味雞翼($38)
選用肥美雞中翼，炸粉係秘製，就算淋上醬汁後都保持到香脆感。醬汁係芝士汁加入明治牛奶及意大利松露，味道唔會太膩，而且松露味都幾突出，食完後口腔有松露嘅餘韻。
好醒鹹蛋雞粒($38)
鹹蛋黃醬汁係用自家烘焙鹹蛋黃同牛油製成，外表金黃，味道鹹香惹味，真係食到唔停口～
慢煮蛋X.O.撈粗($33)
平時食撈粗都係喺魚蛋麵檔食用蠔油撈果啲，呢度就用咗自家製X.O.醬同醬油，再加埋流心慢煮蛋，味道層次又豐富咗。而且呢隻蛋仲係以63度慢煮方式煮，保證隻隻都咁流心㗎。
胡椒勁脆雞皮($28)、鮑汁煎釀三寶($28)
雞皮係就係邪惡，但炸到咁薄脆，加埋胡椒真會係令人一塊又一塊咁食。煎釀三寶就用鮑汁取代豉油，無咁鹹之餘仲多咗份鮮～
陳皮話梅梳打($28)、夠薑香茅茶($28)
話梅梳打用上九製陳皮、話梅及冰糖糖漿，甜、酸同鹹味都恰到好處，熱天飲夠哂解暑。香茅茶味道濃郁，香茅愛好者不可錯過～
地址: 中環擺花街8號地下2號舖
文、相、片: Yanica