一年容易又中秋啦，每年到呢個時候，屋企都會買定一盒盒月餅應節。但係宜家通貨膨脹，搵食艱難，一盒月餅都成幾百蚊，倒不如自己DIY整月餅，又可以慳錢，又可以自己選擇餡料，落幾多糖、幾多油都可以自己決定，仲健康啲添！
蓮蓉雙黃月餅
Photos by gigichiu1028
1. 首先，將蓮蓉分為小份搓成長條，每份稍稍壓薄再包入蛋黃，作為月餅餡
2. 把油、糖漿、鹼水同鹽放喺容器內，微波爐加熱幾十秒，直至糖漿變稀。篩入麵粉拌勻，蓋上保鮮膜，喺室溫放置四小時以上，作為月餅皮
3. 將月餅皮搓成長條，分成約20克一份，喺枱面灑上手粉，用膠刮刀將月餅皮壓平
4. 將月餅餡放喺月餅皮之上，一手輕推月餅餡，一手輕推月餅皮，令月餅皮慢慢展開，直至將餡料完全包住
5. 喺餅模同包好嘅月餅度撒上少許麵粉，以防黏手，之後將月餅放入模型中，力量均勻咁壓平，上下左右都輕敲一下，就可脫模
6. 先將焗爐預熱至230℃，再喺月餅表面噴少少水，放入焗爐5分鐘，之後取出喺餅面刷蛋黃液，再放入焗爐焗15分鐘即成
綠豆冰皮月餅
Photos by aliceha份量：12個
1. 將綠豆洗淨浸泡半個鐘，再放入電飯煲用兩杯水蒸熟，作為綠豆蓉
2. 將綠豆蓉倒入鑊中加糖伴炒，煮到稠稠哋嘅時候，就可以加入煉奶、奶粉、奶油再煮一陣
3. 冰皮方面，先放糯米粉、在來米粉、無筋麵粉，再加以牛奶、沙律油攪勻，然後放入電飯煲用一杯水蒸熟
4. 攤凍蒸熟嘅冰皮後，將其揉勻
5. 輕輕壓平冰皮，將綠豆蓉放其之上，慢慢包入收口捏緊
6. 喺餅模同包好嘅月餅度撒上少許日本太白粉，以防黏手，之後將月餅放入模型中，力量均勻咁壓平，上下左右都輕敲一下，就可以輕鬆脫模
7. 最後將整好嘅冰皮月餅雪凍就可以食用
