呢間日式御好燒專門店登陸香港一週年，居然搵嚟Hea爆代表梳乎蛋合作，將梳乎蛋變成招牌御好燒同文字燒等美食！各位Fans影相呃完Like之後，會唔會唔捨得將自己整嘅梳乎蛋食落肚？
 

道頓堀御好燒同日本梳乎蛋合作，由1月22號至4月22號，分兩個階段推出共四款梳乎蛋限定料理，每款都各有特色，大家可以按自己喜好同入廚經驗嚟選擇，因為想燒出好味嘅梳乎蛋料理真係需要啲技巧！咁點揀好？睇開飯仔介紹DIY步驟啦！
 

最搶眼：梳乎蛋御好燒

梳乎蛋山藥面膜御好燒（$118）

DIY步驟：
1. 倒適量油到預熱好嘅鐵板上，再倒入攪拌好嘅粉漿
*貼士係御好燒粉漿當中會有兩塊年糕，盡量將年糕平排放喺中間，賣相靚啲之餘，亦令年糕易啲被煎熟！
2. 煎五分鐘後翻面，過五分鐘後再翻一次最後再煎約五分鐘
3. 倒上山藥蓉，中間挖一個窿，放上蛋黃後貼上食用貼紙，最後按喜好灑上海苔粉
 

御好燒食落外脆內軟富蛋香，加上山藥蓉增加口感層次。雖然可能會有啲唔捨得，不過篤穿蛋黃點嚟食的確更香口。除咗賣相似足放大咗嘅太陽蛋夠得意之餘，另一亮眼點係裡面嘅煙韌年糕，拉絲效果滿分！
 

最嫩滑：梳乎蛋文字燒

梳乎蛋冚被被炒蛋文字燒（$108）

DIY步驟：
1. 倒適量油到預熱好嘅鐵板上，再倒入文字燒食材
2. 將椰葉切細然後仔細拌炒，再做成冬甩形狀
3. 將粉漿倒喺中間，稍微凝固後連同材料一同拌炒至理想熟度
4. 煎香煙肉後放上文字燒，最後貼上食用貼紙
 

文字燒口感比較似炒蛋，蛋漿、山芋同芝士碎等材料味道同口感都配合得唔錯。雖然夠哂嫩滑，但亦係四款料理當中較為難整嘅。如果自問係料理新手，不妨好似開飯仔咁多啲請教店員啦。
 

最快手：梳乎蛋炒烏冬

梳乎蛋束縛纏身炒烏冬（$118）

DIY步驟：
1. 倒適量油到預熱好嘅鐵板上，再倒入烏冬同食材
2. 將烏冬炒至鬆散後加入炒麵汁，炒約一分鐘
3. 喺烏冬中間放上蛋黃，最後貼上食用貼紙
 

日本稻庭烏冬已經先煮熟，所以只需要炒香就得。烏冬口感煙韌有彈性，加上明太子食係幾香口嘅。不過注意最好趁熱食用，因為放得耐就會出現烏冬變黏嘅情況。
 

最易整：梳乎蛋牛筋飯

梳乎蛋牛筋飯（$108）

DIY步驟：
1. 將裝住牛筋飯嘅陶板放上鐵板加熱
2. 等雞蛋變成理想生熟程度再淋上醬汁
3. 貼上食用貼紙
*注意返陶板非常熱，貼貼紙同食嘅時候務必小心！
 

唔需要任何技巧，等大概十五分鐘到就食得，完全係最符合梳乎蛋慵懶特質嘅料理呀。牛筋非常軟腍入味，而且用陶板加熱同用煲仔煮飯有異曲同工之妙，記得挖埋啲飯焦嚟食。留意返醬汁係特製嘅濃郁醬油，如果好似開飯仔咁貪心落哂就可能會覺得偏鹹。
 

梳乎蛋貼紙小貼士

「懶得貼」表情食用貼紙

Fans們注意啦，要完成梳乎蛋料理，其實最重要嘅步驟就係最後貼上食用貼紙！貼紙係用蒟蒻粉、可可粉同米粉等製作而成，所以可以放心食落肚。而要注意嘅係食物太熱嘅話，蒸氣會令貼紙變得難貼，所以餐廳都建議大家將食物從鐵板放上枱之後再貼貼紙。
 

可以自己DIY燒餅已經夠好玩，今次同梳乎蛋聯乘更有療癒Feel。提埋大家餐廳仲有限量嘅梳乎蛋禮品畀各位免費或加錢換領，Fans們勿失良機啊！
 

道頓堀御好燒 x 梳乎蛋 限定料理
第一彈日期：2018年1月22日至3月4日
第一彈供應食物：梳乎蛋山藥面膜御好燒，梳乎蛋牛筋飯
第二彈日期：2018年3月5日至4月22日
第二彈供應食物：梳乎蛋冚被被炒蛋文字燒，梳乎蛋束縛纏身炒烏冬
 

文、相、片：Cathy