由協康會主辦嘅「第25屆全港廚師精英大匯演」於4月27日盛大舉行，雲集咗48間城中熱門餐廳及酒店，由一眾廚師為到場人士預備一系列豐富嘅菜式！當中包括香港君悅酒店、海逸酒店集團、香港洲際酒店等，仲有米芝蓮級數嘅VEA Restaurant and Lounge及平民美食台南阿豆仔。即刻等開飯仔帶大家睇睇有咩好嘢食先？

全場最受歡迎嘅菜式，一定係呢個君悅酒店推出嘅竹炭龍蝦包，龍蝦肉係即煮，放入黑色麵包，加埋酸酸甜甜醬汁，人龍不絕呀！

另一款人氣嘅甜品，就係呢款漢堡馬卡龍，師傅真係逐層逐層砌，有「芝士」「生菜」加「芝麻」，像真度有一百分。

今年約有五間新參與嘅餐廳，包括台南阿豆仔、拉斐特及TOWN by Bryan Nagao等，都相當受在場人士歡迎。

餐廳都將招牌菜帶到嚟會場，好似Bricklane嘅班尼迪蛋、Mirage Bar & Restaurant嘅黃魽魚配氈酒西瓜同帝苑軒嘅公仔點心等等，大家都食得相當開心！

唔好以為份量少少，食完個迷你叉燒飯、龍蝦汁蝴蝶粉都真係幾飽肚。

當晚收益將會撥捐協康會家長資源中心，為有特殊需要兒童、青年及其家庭提供支援服務。享受美食之餘又可以做善事，食得有意義。今年錯過咗唔緊要，下年繼續密切留意啦！

文、相：Perrins