發現將軍澳大型商場連鎖店以外的選擇

據講，香港有三大美食荒漠區，一馬鞍山、二將軍澳，三青衣。馬鞍山其實都有綠洲之前都同大家介紹過，今次就講下將軍澳。將軍澳算係「新巿鎮」（好耐冇聽過呢個term）入面比較新嘅一個，所以大型商場同連鎖餐店都比較多，不過都唔代表冇好嘢食嘅。

人氣中式甜品　　聰嫂私房甜品

Photos by donkey-thin & shine618
第一間要講嘅，一定係聰嫂。由港台canteen做到出嚟自己開甜品舖，聰嫂淨係喺將軍澳都有兩間舖。食中式糖水得嚟，又唔會話係勁傳統嗰啲，即係有燉雙皮奶，但會溝埋芒果奶昔，兩種奶製品夾埋又幾夾，幾滑。另外招牌龍眼椰果冰絕對係夏天必食，打碎晒啲龍眼肉混入啲冰度，成碗嘢白雪雪但好清甜，受歡迎程度從你遲少少去到都賣晒就知。

海鮮鍋　　惠食派

Photos by C'mon Food! & 為食龍少爺 SiuYeah
睇唔出呢間雖然望落似茶餐廳，但入面除咗小炒，仲有得打邊爐。有個海鮮鍋係幾吸引嘅，有蝦呀魷魚同扇貝等等，成煲都真係幾有鮮味。另外仲有龍蝦雞煲或者雞蟹煲都係唔錯嘅選擇，啲雞食得出有用酒煮過嘅，唔怕熱氣嘅食到咁上下再飲下個用海鮮熬成嘅湯，都幾正，不過夏天打邊爐係熱咗少少，食住小炒好似菜脯蛋、炒斑球都OK。

清湯牛腩河　　鴻興清湯腩專家

Photos by coowl & KKJJ6562
繼續都係小店嚟，牛腩河又好、牛雜又好，都係要腍嘅腍，要爽嘅爽，湯底望落幾清，飲落就好有肉香味，難得地唔太油。識食又食得辣嘅，一定會落埋辣椒油，呢度嘅辣椒油感覺比出面餐廳嘅辣，但好吊味，係成碗腩河嘅精髓嚟。

泰式鮮味　　金葉軒

Photos by hihi1234567890 & noel.ho.1297
行入少少去坑口，有間唔錯嘅泰國餐廳。冬蔭功湯好足料，大蝦都有兩隻，所以煲湯都鮮鮮甜甜，不過就辣咗少少，未必人人頂得住。至於生蝦就都幾新鮮，夠肥厚，有彈性，另一樣可以話係必食嘅泰式料理——炒辣蟹，同樣都係好鮮甜，真係要講返句：蟹有蟹味呀。

港式小炒　　東方小廚

Photos by shuki cheung & 斑紋
喺坑口村入面嘅港式小炒，蠔餅、薑蒽蠔煲、生炒骨等等，好「佬」，但係好有香港風味，鑊氣夠，又炒得幾香口，最好人多少少嚟，可以叫多幾碟餸送飯。食生腸嘅不妨叫埋個生腸沙律，所謂嘅「沙律」其實係洋蔥為主，都幾多生腸，係開心嘅。

厚切魚生　　瀛 ‧ 日式料理

Photos by foodictionaryhk & 黑色絲聞人
又係坑口村。想喺將軍澳範圍搵日本嘢食，可以試下呢間。呢度都幾慷慨，啲刺身厚切，特別帆立貝同埋牡丹蝦都好肥美，而且唔係得個厚字，都好新鮮。仲有好多燒物，其中燒豆腐幾值得提下，燒到外脆內軟，冇爛之餘仲係好滑，淋埋照燒汁食幾惹味。甜品雪糕有嚟自日本嘅紫薯味同柚子味，都好吸引。

文：Kar

隨時接收最新資訊
讚好OpenRice專頁！