開喇開喇，講咗咁耐海底撈終於都開業啦！呢一間國內最紅嘅火鍋店，分店遍佈全中國，而家唔使北上深圳，去油麻地就食到！開飯仔率先去試食，感受吓五星級服務，同各位報告返先！
香港海底撈開喺油麻地九龍行，佔兩層全層，但比起大陸分店唔算大。座位以卡位為主，亦有幾間貴賓房。要等位？女士可以享用免費美甲或者手部護理服務，大約15-20分鐘，有專人幫你修甲、搽指甲油同做手mask，不過都要排隊架！
仲有波子棋、鱷魚牙醫俾你消磨時間，小朋友可以進入兒童遊樂室，有少量玩具同埋電視睇。飲品小食當然都係免費任食，唔怕餓親。
入座後，侍應會用膠袋幫你笠起電話，又有圍裙、紮頭髮橡筋、眼鏡濕紙巾，亦會用布幫你蓋住手袋衣物，非常貼心。
餐單係iPad，湯底有椰子雞、清油無渣麻辣、菌湯、蕃茄、三鮮同青椒，可以揀雙拼或者四格，再逐格收費，單拼湯底$138起，最貴係椰子雞$288。調味料夠晒多，其中泰式酸辣係香港獨有醬汁，而且有海帶、哈蜜瓜等前菜、粥品或糖水任食，每位$28。
同大陸店食物選擇就有少少分別，招牌撈派千層毛肚、蟹肉墨魚滑、貝柱滑都冇，不過香港就有日本和牛、生蠔、象拔蚌仔等海鮮。所有菜式可以點半份，先試味再encore。試味當晚海鮮一早賣晒，連最招牌嘅撈麵都冇！好失望。
冇得睇拉麵表演，但都有變臉。食至中途有變臉大師出場表演，仲同食客打成一片，好好氣氛。
服務可以用無微不至嚟形容，侍應一人照顧三枱客人，主動幫你淥配料、加湯、換碟、斟茶，基本上完全唔使自己郁手。而且非常健談，對菜式有了解，每樣配料要淥幾耐、配咩醬汁、食法都好清楚，加分。
食物方面，招牌清油麻辣湯底可以揀無渣，咁就唔會愈滾愈辣。正常辣度的話麻辣都算輕微，但幾香，而且香料唔會蓋過食物原味。椰子雞係用純椰青水，先飲碗湯，味道好清甜，而且愈煲愈甜。文昌雞肉偏瘦，鮮味唔太突出，但肉質彈牙。蕃茄湯就夠晒濃，酸甜開胃。
配料大約有70款，侍應推介撈派蝦滑($138)好食，蝦肉爽彈，撈派滑牛肉($98)都唔錯，用香料醃過，本身有微辣。香港人最愛嘅手切肥牛欠奉，日本和牛($368)油花靚，放入辣湯就嘥晒，清湯比較好，柔軟得來都有肉味。美國牛小排粒($198)肉質較韌，個人就覺得一般。
麻辣湯底配內臟是常識吧？撈派鴨腸($108)去晒肥膏，淥15秒就食得，好爽脆。鴨血滑溜但唔易散，都係必點之一。仲有毛肚、豬腦花、黃喉、鴨舌等選擇。
洗手間雖然唔豪華，但用品超齊全。漱口水、牙線、護手霜，甚至洗面泡、護髮油都有！食完飯，仲送零食俾你帶走，真正又食又拎！
8/10正式營業，暫定只開10am-1:30pm，4pm-12mn，之後會開至凌晨兩點，更會24小時營業！暫時不設電話訂座，想食唯有walk-in。（一切以開業後店方決定為準）
地址：油麻地彌敦道555號九龍行2-3樓
文、相、片：Perrins