「我隻青蛙去咗邊？」可能係近期最多人問嘅問題。個個都玩手遊《旅行青蛙》，個個隻青蛙都通度走唔黐家，出咗去耐耐都唔返嚟。不過見到佢得閒寄下postcard帶下手信返嚟都幾開心嘅。唉，我都想好似隻青蛙咁，日日喺日本係咁周圍食嘢啊，不過佢啲嘢食究竟喺日本邊度搵嘅呢？

溫泉饅頭

 圖：遊戲截圖、kumashin00(IG)

呢款隻隻來訪嘅動物都鍾意食嘅溫泉饅頭，基本上有溫泉嘅地方都有得賣，好似熱海呀箱根呀嗰啲地方就一定搵到。溫泉饅頭都有好多種口味，黑糖、抹茶等等都係較受歡迎嘅味道，內餡有時仲會有紅豆或者芝麻餡之類。浸完個靚溫泉再食返個溫泉饅頭都咪話唔疏乎。其中，下呂溫泉仲有勁多青蛙圖案添~~

五平餅 – 名古屋、飛驒高山

 圖：遊戲截圖、kkkkkjoooo（IG）

呢塊橢圓形嘅餅，係飛驒名物嚟呀。壓扁咗啲粳米，搓完再用籤拮住佢慢慢烤下，蘸埋啲高山味噌醬油咁，聞落幾香，食落就鹹鹹地甜甜地，米粒微焦。名古屋啲街頭好易搵到嚟食。

外郎糕 – 名古屋

 圖：遊戲截圖、jd_choco（IG）

由米磨成粉再蒸製而成嘅傳統和菓子，加入唔同嘅糖同材料，例如黑砂糖、白砂糖、抹茶等等，就可以做出唔同色、唔同味嘅外郎糕。一般都係甜甜地，幾鬆軟下。Btw，補充返，佢上年仲入圍咗個日本榜嘅第2位，不過個榜係《gooランキング》做嘅「最失望的當地手信榜」。

#我真係多謝你呀

瓦煎餅 – 關西、神戶

 圖：遊戲截圖、ao2no38（IG）

呢塊餅嘅外形，幾似日本以前啲屋嘅屋頂瓦片，所以就叫做瓦煎餅。主要係用麵粉、雞蛋同砂糖做嘅，相對其他煎餅係比較甜身，但一樣咁脆口，上面仲會烙上唔同嘅圖案添。神戶有間好出名嘅老店「龜井堂本家」都有得賣。

硬煎餅 - 關西

 圖：遊戲截圖、ririiiii_kooo（IG）

叫得做硬煎餅，就梗係好硬啦，硬到通常要用槌仔揼碎先稍為食到咋。

你哋隻青蛙又帶咗啲咩返嚟畀你哋食呀？

文：Kar