以香港人愛日本菜嘅程度，居酒屋喺各區都有唔少。最近九龍城呢間新店就搞搞新意思，主打一系列煙燻菜式，選用頂級櫻花木燻製，可以提升食物風味，招牌之一就係煙燻五重芝士Pizza！鐵板菜式同活魚刺身都有水準，而且定價親民，值得一試。
 

上戶酒場位於九龍城龍崗道，供應多個種類嘅日本菜，包括坊間較為少見嘅煙燻菜式同活魚刺身。用料嚴謹，海鮮嚟自日本各地，以時令飛機貨為主。居酒屋唔少得嘅日本酒亦有多款選擇，例如嚟自日本各地嘅清酒，容易入口嘅日本果酒等。
 

煙燻五重芝士Pizza（$108）

居酒屋招牌菜之一，五重芝士分別係日本製嘅藍芝士、高達芝士、德國草原芝士、車打芝士，同及格拉娜·帕達諾芝士（Grana Padano）。批底會先煎香，再以櫻花木煙燻約5分鐘，令Pizza帶有濃郁煙燻香氣。批底偏薄身，香脆煙韌。芝士趁熱有拉絲效果，口感香軟。
 

煙燻厚切三文魚（$78）

同樣以櫻花木煙燻，主角換成挪威三文魚，切成Bite Size一啖一件啱啱好。燻至半熟嘅三文魚粉嫩誘人，而且口感非常軟滑，先品嘗到煙燻香氣，之後有魚油香，層次分明。
 

煙燻日本豚腩肉（$78）

鍾意重口味啲嘅話就推介呢款煙燻日本豚腩肉，厚度適中嘅腩肉先煎香同時逼出多餘油分，最後用櫻花木煙燻。豚腩肉食落外脆內軟，油花甘香，鹹香惹味，送酒一流呀！
 

煙燻穴子壽司（$68）

穴子即係星鰻，比一般食到嘅鰻魚油脂較少，肉味淡雅，肉質就更為軟腍。呢件煙燻穴子壽司嘅穴子會加上香甜嘅鰻魚汁再煙燻，然後將穴子包住用日本米製作嘅壽司飯，最後加上蟹子。可以食到穴子嘅柔軟香甜、一粒粒蟹子嘅爽脆，同壽司飯嘅軟糯，口感豐富。
 

龍蝦味噌虎蝦（$178）

除咗煙燻之外，餐廳嘅鐵板菜式都值得一試。好似呢份龍蝦味噌虎蝦就鮮味十足。大大隻虎蝦先用鐵板煎香，鎖住鮮味後加上裡面有龍蝦味噌，一上枱就聞到好香濃嘅蝦味！虎蝦口感非常爽脆，而龍蝦味噌唔單止增加鮮甜風味，裡面嘅蝦肉亦好彈牙。
 

鐵板鮑魚（$98）

鮑魚都係$100有找！而且無將貨就價，用嘅係嚟自南非嘅新鮮鮑魚，肉厚彈牙。煎嘅火候亦恰到好處，食落嫩滑唔韌。配搭特製嘅蟹肉昆布汁，味道層次就更豐富。
 

 

蔥吞拿魚腩薄脆（$58）

送酒小食推介之一，炸米通上面係吞拿魚腩蓉、黃瓜碎、大葉碎同京蔥碎，色彩繽紛令人食指大動。金黃色嘅薄脆同吞拿魚腩蓉一脆一軟層次分明，略嫌吞拿魚腩蓉嘅油香唔太明顯。
 

燒明太子伴青瓜片（$88）

鍾意惹味小食嘅就可以食呢款燒明太子伴青瓜片，明太子燒過後香氣更濃郁，切成一片片配搭青瓜片。食起嚟明太子嘅微辣同鹹香非常醒胃，同時多汁清脆嘅青瓜就中和返明太子嘅濃味。
 

時令活魚刺身（原條）（時價）

原條活魚刺身真係唔常見，呢度就會視乎季節，定期推出唔同嘅本地活魚刺身。好似呢期就有肉質鮮美嘅鯛魚，切至半透明嘅薄片，點少少酸汁更突顯魚肉嘅鮮甜味。
 

刺身拼盤（$438/六款）

刺身拼盤有五款、六款，同八款配搭選擇，好似拍攝呢款就有赤貝、帆立貝、吞拿魚腩、油甘魚、三文魚、三文魚籽。非常新鮮，而且係厚切！
 

（午市套餐）牛舌薄燒配三文魚炒飯（$78）

想食平啲Lunch Set就最啱，最平$78就有得食之餘仲包埋海鮮味噌湯同前菜。鍾意食牛舌嘅話就要試牛舌薄燒配三文魚炒飯啦，牛舌薄片調味後加上蒜片、牛油等放上先預熱嘅鐵板上，燒至約4成熟嘅時候上枱，大家就可以按自己喜歡控制熟度。而且飯唔係普通白飯，而且加入三文魚、櫻花蝦、雞蛋等材料嘅炒飯，特別香口。
 

（午市套餐）上戶海鮮丼（$248）

想豪啲亦有海鮮丼，呢份就有齊海膽、蟹鉗、帶子、赤蝦、拖羅、蟹膏，同蟹籽，鋪滿到爭啲見唔到飯呀。刺身新鮮，特別係拖羅入口即溶，富魚油香。
 

上戶酒場 
地址：九龍城龍崗道33-39號龍翔閣地下A號舖

文、相：Cathy