燒肉熱潮席捲全城！唔單止日本有名店抵港，另一邊廂亦有韓國代表進駐旺角！呢間韓式烤肉店特別用炭燒代替一般鐵板燒，鎖住肉汁之外亦增添一份炭香。而且食材講究，由韓牛唔同部分到唔同切法都有，啱哂各位有要求嘅食肉獸！
 

柞木炭家位於旺角一間新開張商場嘅5樓，室內以韓屋做靈感，另有室外座位。從店名或者大家都估到，店方以炭燒為賣點，配合頂級食材。
 

優質韓牛推介

韓牛肋眼上蓋（$328） 

嚟到韓式烤肉店點可以錯過韓牛！餐廳選用韓國全羅南道嘅上乘韓牛，好似呢件坊間少見嘅韓牛肋眼上蓋就係包住牛肋眼芯四周嘅部分，亦係肋眼部位嘅精華所在，要靠師傅嘅專業切割方式先可以保留一整條！
 

呢個部分嘅特色係油脂分佈平均，建議原條燒到5-7成熟再剪開享用，咁就可以燒走多餘油脂，同時保留到裡面嘅肉汁。口感鬆化但又未至於好似和牛咁油膩，富牛香之餘最後口腔仲有少少油脂嘅甘香。
 

韓牛牛小排（汁燒）（$165） 

另一推介部位係牛小排，即係牛嘅肋脊位，雪花均稱帶少少筋。而汁燒代表師傅先用自家調製醬汁醃製，獨特嘅甜香同鹹味平衡有致。
 

而牛小排可以燒至7成至全熟，依然保持到嫩滑口感！牛小排相當入味，不過相比起嚟炭香味就唔太明顯喇。
 

牛舌三吃（$228） 

餐廳師傅對韓牛好有研究，所以唔同部位嘅肉會選用唔同嘅切法。呢份牛舌三吃就係一個好例子。一份有齊牛舌嘅三種切法：常見嘅輪切刀法、長條形嘅纖維縱長切，同牛舌眼芯厚切。
 

三款口感的確各有不同，圓形薄身嘅輪切刀法因為係同牛舌嘅纖維成直角，輕烤之後口感爽滑。而長切牛舌會較為柔嫩。最後厚切牛舌係最爽口，亦係最富牛香同肉汁嘅。
 

 厚切濟州黑毛豬梅肉（$158）

除咗牛肉之外，亦有豬、雞同海鮮選擇，包括濟州最出名嘅黑毛豬，喺天然無污染嘅環境生長，無一般豬肉嘅腥臊味。而豬梅肉即係上肩胛肉，肉質結實彈牙。
 

唔好睇肥膏位好似有啲多，網燒之後多餘油脂會燒走，食落油花唔會過多。有豬肉香，不過油甘香就略遜於韓牛啦。
 

 
韓式主食精選

柞木雪濃湯飯（$128）

想再飽肚啲嘅話，餐廳都有唔少主食同熟食。最有特色嘅就係呢碗雪濃湯飯，高湯用韓國產地嘅牛骨、膝骨同牛內臟等熬製至少12個鐘，再以銅壺奉上，方便大家相機食先。
 

食之前將熱辣辣嘅高湯倒落去，注意盡量淋喺中間塊韓牛上面，令牛肉灼至半熟保持嫩滑口感。米白色嘅高湯富牛骨香，餘韻悠長帶甜味，最值得一讃嘅完全唔膩！
 

（午市套餐）白切肉套餐（$62） 

而午市套餐亦有烤肉同主食等唔同選擇，呢份白切肉套餐就有白切肉、紅豆飯同大醬湯。白切肉即係用雪梨、洋蔥、大蔥同韓式大醬等材料去熬煮嘅五花肉，豬皮相當有彈性。
 

白切肉口感鬆化，不過味道就比較淡，所以最啱用菜葉包住白切肉同泡菜一齊食，唔單止可以可以增加味道同口感層次，亦進一步減低油膩感，感覺仲更加健康。
 

魔法梳打（$36） 

飲品方面以韓國酒同梳打為主，鍾意打卡嘅當然要點呢杯用咗蝶豆花嘅藍色梳打，倒入檸檬汁之後就會變成夢幻紫色。
 

而餐廳提供七款前菜、包括沙律、柚子蘿蔔等等，比較特別嘅係原棵泡菜，畀大家想食幾多剪幾多。
 

柞木炭家
旺角彌敦道700號T.O.P.5樓501號舖

文、相：Cathy