呢個夏天的確係有唔少新開嘅飲品店，但幾乎都係清一色台式黑糖珍珠鮮奶，飲到有啲悶？不如轉撐本地出品！尖沙咀呢間新店專賣港式絲襪奶茶，每日新鮮小壺煮茶，人手撞茶再雪過夜，仲可以加台式珍珠、紅豆等配料。店主跟「金茶王」學沖奶茶，出品比起唔少茶餐廳更出色！
 

善茶位於尖沙咀白蘭軒道，其中一位店主之前跟2016年「金茶王」陳師傅學沖絲襪奶茶，之後再用大半年研發出獨家茶葉比例配方：用幼茶、中粗茶、同兩款粗茶，共四種斯里蘭卡紅茶搭配。而且由沖茶、煲茶、撞茶到回溫都一絲不苟，特別係用人手撞茶四次，將草青味揮發走，突顯紅茶濃香。
 

珍珠港式奶茶（$30）

絲襪奶茶同珍珠原來都幾夾！奶茶選用植脂淡奶，少一份奶羶味而保留香滑口感。珍珠就係台灣嘅黑鑽珍珠，帶少少焦糖香味。因為奶茶已經雪過夜，可以嗌走冰唔洗驚冰融咗會變淡。開飯仔就試咗走冰半甜，茶甘香濃而且Aftertaste強烈，非常醒神。珍珠就仲有少少暖，甜味適中而且口感Q彈。
 

港式奶茶紅豆冰（$32）

好有港式風格嘅配搭，粒粒紅豆加淡奶再加絲襪奶茶，形成搶眼嘅漸層效果。比起珍珠奶茶，呢一杯嘅紅豆甜味比較突出，記得影完相打卡後要搞勻先飲。奶茶無澀味亦唔會榎歰歰，容易入口。如果你飲開台式珍珠奶茶，建議嗌正常甜度同多奶。
 

 

咖啡點子港式鴛鴦（$30）

飲落先有咖啡味，之後係奶茶嘅甘香，濃郁得嚟無苦味亦無酸味。咖啡點子其實即係粒粒咖啡啫喱，味道較甜同時增加咬口。
 

壽眉珍珠拿鐵（$28）

除咗港式奶茶之外，亦有香港茶樓常見嘅茶飲，好似壽眉、普洱、鐵觀音咁。呢杯壽眉珍珠拿鐵就係小店推介，茶香清新有生津感。不過就略嫌珍珠嘅焦糖味有啲搶走茶甘味。
 

小店裝修主題係懷舊香港，紙皮石、手寫餐牌、紅色燈罩等等，打卡位超多。而餐廳希望將港式奶茶技藝呢項非物質文化遺產推廣畀香港人同遊客嘅同時，亦用茶同大家結善緣。所以每買一杯飲品都會得到一個代幣，代表將$1捐畀慈善機構！飲茶打卡仲有得做善事，何樂而不為呢？
 

善茶
尖沙咀白蘭軒道2號地下A舖

文、相、片：Cathy