鐘意食泰國船麵嘅又有新選擇啦！元朗新開咗間船麵專門店，佢地嘅menu 簡單直接，主食方面就獨沽一味淨賣船麵，外加幾款正宗泰國小食同飲品。店鋪係由四位熱愛泰國既香港小伙子開，佢地自從七年前去泰國布吉島食過路邊檔嘅船麵後，對船麵嘅熱愛就一發不可收拾，所以就決定喺香港開返間！

店內所有食材來源有九成都係嚟自泰國，店主Aska 話，如果唔用泰國食材或調味料，味道就唔會地道。由於大廚嘅未婚妻係泰國人，所以菜式食譜係由佢親自提供教授。不過佢就話佢地賣嘅唔係正宗，而係泰式家庭口味。

牛肉船麵($58)

湯底用牛骨熬成，再加入牛肉、牛內臟同藥材等熬足十二個鐘，味道濃郁，帶有少少牛骨自己甜味。牛肉船麵跟牛腩同泰國牛丸，牛腩每日都會去街市新鮮買，好軟唸。麵底方面可以自由選擇金邊粉、河粉、粉絲同米粉。

豬肉船麵($52)

湯底都係用同樣嘅牛骨湯，所以唔食牛要注意返。豬肉丸好出色，食落肉味重，有少少似扎肉嘅味道。麵底建議可以揀粉絲，好掛湯。

火辣阿嫂青木瓜沙律($38)

小食方面就無太遷就香港人嘅口味，反而追求原始泰國風味，青木瓜沙律跟足當地做法，會比較辣，但店主話其實唔辣就唔好食架啦。

泰式牛扒沙律($52)

牛扒用咗西冷扒，食落去有肥有瘦，肥嘅部份好香口唔會漏，加埋用洋葱、辣椒、薄荷、青葱同鱼露，重口味人士就啱哂。

篤篤炸丸($42)、酸辣凍雞翼($46)

用返泰國牛肉丸同豬肉丸去炸，點埋泰式雞醬同酸辣海鮮醬食，做小食就一流！酸辣凍雞翼味道酸酸辣辣，係開胃之選。

泰式奶茶($24)、香茅班蘭特飲($24)

因為泰國一年四季都咁熱，所以正宗泰式奶茶會比較甜，等啲冰融化嘅時候奶茶唔會過淡，呢度嘅泰式奶茶用返泰國紅茶葉，但甜度就有減少。香茅班蘭特飲有清熱同防敏感功效，香茅味重但又唔會蓋過班蘭味，甜甜地又幾好飲。

另外店內裝潢都好用心，由創辦人同兩位設計師打造，天花板嘅裝飾全部都喺泰國買返嚟，而壁畫特登畫上泰國代表事物；如大象， 四面佛同 街頭麵店等等，令食客有置身泰國嘅感覺！

阿叔泰麵

地址: 元朗西菁街20號益輝大廈地下3號舖

文：Yanica

相、片：Tom Li