由年頭到而家，都不斷有各國嘅名店進駐香港，最近又有間法國烘焙店，選址開喺尖沙咀K11 Musea商場。而且呢間烘焙店仲相當大，佔地成3500平方呎，舖位都有4個，又賣包又賣咖啡仲有主菜食添！

呢間烘焙店由法國烘焙家族第四代傳人，國際知名糕餅主廚Gontran Cherrier主理，喺全球已經有超過50間舖，最近首次進軍香港！佢哋最出名就係法式長麵包同埋牛角包，麵粉同牛油等材料都係由法國直送，各款麵包由搓麵糰到塑形等步驟都係人手製作，全日不斷出爐，每日賣逾2000件㗎，難怪每次行過都會見到包舖前面有條人龍。

50幾款手工製品包括有牛角包、法式長麵包、維也納甜酥麵包、英式鬆餅、曲奇同甜點等等。

招牌牛角包當然必試啦，就咁望都見到有好多層摺層，外層酥脆內層柔軟，仲有好香牛油味添。主廚建議大家，可以喺中間撕開，一分為二咁食就最perfect池。

牛角包仲有好多款口味，特別推介杏仁味同Raspberry Cloud。前者面層鋪滿晒一片片杏仁，中間又有滿滿der杏仁果醬，口感豐富，味道香甜；至於後者，係香港限定款式嚟！上面唧咗一層蛋白糖霜，放咗幾粒raspberry，再用火槍輕輕燒過，微微帶甜幾好食。

 咖喱穀物法式長麵包，咖喱粉以薑黃、肉桂、風乾芥菜粉自製

餐廳內則供應多款法式菜色，其中法式洋蔥湯好有正宗巴黎嘅風味，師傅將洋蔥炒至金黃色，湯底混入牛肉同雞肉一齊熬製，洋蔥香中滲有淡淡肉香，面頭仲有片多士同半溶巴馬臣芝士，香口得嚟仲好飽肚。

布袋芝士沙律則係相對清新輕盈啲嘅選擇，師傅會按時令挑選荷蘭空運到港嘅Heriloom蕃茄，今次見到嘅係紅色同橙色，師傅話遲啲有可能會有黃色甚至黑色嘅蕃茄，每隻色嘅味道都有唔同，有甜有酸。而布袋芝士則係意大利新鮮空運到港，奶味香濃仲好軟滑添。

大蝦扁意粉同墨魚汁海鮮意大利燴飯都係以由新鮮魚骨加澳洲柑皮等熬製而成嘅魚湯做基底，啲意粉同飯索晒個湯底，所以食落都有陣陣嘅鮮味。

 椰子咖啡（左）、新鮮紅西柚芒果沙冰（右）

Gontran Cherrier
地址：尖沙咀梳士巴利道18號Victoria Dockside K11 Musea B2樓B205-B207號舖

文：Kar
相、片：Tom Li