於日本全國有55間分店嘅gram，自於2015年於大阪心齋橋開業，直到今日仍然好受歡迎，好多人排隊等食招牌梳乎厘班戟。好消息係即將於31/3香港開設全球首間海外分店，選址尖沙咀商場，相信各位甜品迷都相當之期待！
香港店有50個位，於尖沙咀The One入面，裝修有田園風，設有開放式廚房，可以見到師傅整班戟及甜品。
開業期間有日本gram兩位總廚其中之一龍田師傅坐鎮，確保質素拍得住日本。香港店廚師亦曾去日本受訓十日，所有食物做法完全跟足日本。
打開餐牌，幾乎同日本店倒模一樣，日本有嘅菜式香港都有，當然價錢就有啲分別啦。負責人稱，食材9成係日本總店運過來，包括整班戟嘅粉漿、忌廉等等，而牛油、牛奶就用日本店相同品牌。因為香港水質、麵粉都同日本有分別，所以直接空運過來，味道同日本唔會有分別。
超人氣招牌梳乎厘班戟Premium Pancake，同日本一樣，一日分三次限定發售。時段為11am、3pm及6pm，每節限量20份，真係手快有手快冇！冇得預訂，想食只可以攞籌排隊。
班戟每件至少4cm厚，上枱仍然好鬆軟，搖吓搖吓咁，不過千祈唔好影太耐呀！加埋味道香甜嘅楓糖漿，同埋打到輕盈幼滑嘅忌廉，入口即溶好有空氣感。建議唔好一次過落晒糖漿，食一件先落一次。價錢就稍貴，當地賣¥950，香港就賣$138。
其他班戟種類同日本店一樣，推介Tiramisu，pancake加咗咖啡製成，配埋朱古力粉同吉士醬，香甜濃郁。
意大利芝士蛋糕班戟 $118
烤蘋果配紅茶忌廉班戟 $118 選用富士蘋果同自製紅茶醬，茶味清香。
焦糖香蕉班戟 $98
雜果朱古力班戟 $108
鹹味班戟有三款，其中一款係墨西哥辣豆醬班戟 $118
法式多士 $78
日本就有唔少當店限定款式，好似京都有枯山水、松本有信州蘋果、福岡有班尼迪蛋，亦有時令季節限定。香港店都會有！不過暫時未透露得係咩，到時密切留意啦！
地址：尖沙咀彌敦道100號The ONE 4樓L408舖
文、相、片：Perrins