呢間點心店又有新搞作喇，繼上次嘅Emoji同蠟筆小新，今次輪到荷蘭代表Miffy！仲一口氣出咗超過20款有Ｍiffy嘜頭嘅食品，有點心、甜品、麵飯同飲品，fans真係好難揀呀！14/7開始有得食，期間限定三個月架咋！
餐廳換成Miffy佈置，電視播Miffy卡通片，牆身掛上大大小小嘅畫作，連餐牌、餐紙都見到Miffy。成個系列有16款點心、3款甜品、3款麵飯及2款飲品，大部分都係以Miffy招牌交叉嘴兔仔頭為主。
最得意嘅當然係流沙包，有白色嘅蛋黃流沙同埋啡色嘅朱古力流沙包，兔仔耳好得意！蛋黃流沙以鹹蛋黃加好立克、煉奶同鮮牛油製作，非常流心，味道香甜！朱古力就加咗瑞士朱古力磚製成，相對甜少少，同樣都有爆漿效果！
另一款好得意嘅鹹點係晚安海鮮腸粉，餡料為越南大蝦、帶子同蟹柳，腸粉好似一張被單，蝦餃印上Miffy瞓覺模樣，好可愛～糯米雞、蝦餃都相當像真，海鮮燴飯入面嘅蘿蔔都係兔仔頭架！
甜品都有好多款選擇，糕點就有馬拉糕、椰汁紅豆糕同砵仔糕，貼咗Miffy眼耳口鼻，質感QQ。芒果糯米飯同樣係兔仔頭，仲有大半隻芒果同椰漿，份量十足。
中環及尖沙咀分店都有Miffy點心，只做到10月31日，fans一定要趁早來影相打卡喇！
地址：中環德己立街1-13號世紀廣場地庫
文、相、片：Perrins