來自京都嘅過江龍吉列牛排店京都勝牛兩個幾月前先首次登陸香港，話咁快已經進駐將軍澳開設香港第二分店！京都勝牛係日本市場佔有率第一嘅吉列牛排店，秉承日本總店嘅原創做法及特色醬料配搭，選用來自美國、澳洲及日本牛肉炮製多款經典名物，招牌吉列牛排沿用「黃金六十秒」快炸秘方，牛排外層酥脆肉質依然鮮嫩！開業第一個月仲推出多款新菜單及期間限定菜式，包括呢款鹿兒島A4黑毛和牛西冷，牛魔王必食～
鹿兒島A4黑毛和牛西冷（$438）
開張首月限定供應，每日數量有限，想食要早啲去呀。西冷屬於牛腰上部位置，鹿兒島嘅黑毛和牛出名脂肪纖細而且比例平均，肉味香濃而且質地柔軟，一入口就感受到油脂，相對牛味就少啲。裹漿採用日本技術乾麵包糠、麵粉、雞蛋按照指定黃金比例調配，牛扒以攝氏190瞬間高溫炸至金黃酥脆，上枱時三分熟，如果想熟少少可以用小火爐每邊煎4-5秒，油香更突出。點埋附上嘅日式溫泉蛋及咖喱醬同食層次就更豐富。
翼板伴鰻魚套餐（$188）
新品翼板伴鰻魚套餐同樣以黃金60秒快炸秘技炮製，鰻魚外脆內軟，醬汁香甜但食得出鮮味。而翼板肉就選用澳洲牛製成，油花分佈平均，雖然無日本牛油花咁多，但牛味就重啲，鍾意邊款就睇個人口味喇。
更多【新店直擊】： |
特選海產套餐（$208）
鍾意食海鮮嘅朋友可以揀特選海產套餐，包括炸廣島蠔、大海老及鰻魚，廣島蠔蠔味極濃而且好juicy，大海老香脆肉質都好彈～
東京風豬排鍋膳套餐（$138）
鍾意鹹甜鹹甜嘅滋味，就一定唔可以錯過東京風豬排鍋膳套餐！香脆嘅炸豬排配埋滑蛋汁及甜甜嘅洋蔥醬，送飯一流！
地址: 將軍澳澳南海岸唐俊街23號MONTEREY Place地庫B03號舖
文: Yanica
相: Tom Li
