疫情之下唔知幾時先有得飛，想喺香港嚟個「偽旅行」，旺角呢間新店就幫到你！呢間樓上餐廳裝修以好有異國風情嘅波西米亞風為主，由彩繪玻璃吊燈、土耳其地氈、棉繩流蘇掛簾，連茶具同碟都係走民族風。日間係Cafe主打花茶同千層卷，夜晚就變成酒吧可以試到一系列創意Cocktail！
 

Be Humble位於旺角，試業期間已經吸引到唔少人去打卡，經常處於Full Booking狀態。最近終於正式開業，有位置留畀Walk-in客喇。餐廳老闆們都知道大家好想離開香港去旅行，暫時去唔到就直接將餐廳變成異國風，參考咗好多外國餐廳後最後決定以波西米亞風為主，從吊燈到茶壺茶杯都係佢哋同設計師一一搜集返嚟㗎。
 

Lavender Oolong（$48）

茶葉嚟自本地茶品牌茶氏，以調配花茶為主，呢壺Lavender Oolong係最多人推薦嘅口味，無論係聞起嚟定飲落薰衣草花香都好自然，加上烏龍茶嘅甘醇，芬芳可口。
 

Cookie Egg Roll（$62/件）

蛋糕就嚟自人氣網店xlxlxlxl，原本要抽籤等開團先食到嘅千層卷，而家嚟旺角就食到！每日有唔同口味供應，採訪當日就有甜而不膩嘅曲奇口味，千層卷口感有啲似千層蛋糕，crêpe皮夠薄，而忌廉Creamy得嚟又唔會太Heavy，的確值得一試。
 

 

Sicko（$118）

Cocktail選擇多元化，由經典調酒到自家設計嘅都有，好似呢款上枱仲有奪目白煙效果！以威士忌為基底，加入烤肉桂條調配最後再煙燻，肉桂辛香同煙燻香氣突出。
 

Eden In The Sky（$98）

呢杯就係相當夢幻嘅紫色，以伏特加為基底，調酒底部係巨峰提子酒，上面再加蘇打水營造漸層效果。整體相當清爽。入口先飲到提子嘅甜味同微酸，最後先慢慢滲出酒香，非常易入口。
 

Be Humble
地址：旺角彌敦道594號新城商業中心18樓

文：Cathy
相、片：Tom Li