下午茶心思思唔知食咩好？旺角朗豪坊呢間小食店主打日式迷你熱狗及意大利雪糕，熱狗以新鮮食材製成而且係迷你尺寸，份量恰到好處～店內同時供應多款特色甜品，所有甜品均由行政甜品主廚Frank Law主理，佢過往曾於本港多間五星級酒店擔任甜點主廚，經驗豐富。而且餐廳為配合街頭美食文化，店內特設一幅打卡牆，同時設置紅色長椅，啱晒打卡！
日式霙花熱狗（$28）
各款日式迷你熱狗嘅配搭都充滿新鮮感，因為全部都用大家平時常見嘅食材入饌，但配搭就令人意想不到，而且用自家製嘅豬肉腸或牛肉腸做配搭，肉汁豐富，至於麵包經烤焗後外脆內軟。日式霙花熱狗，加入牛肉腸、柚子醋汁、蘿蔔蓉、青蔥、海苔及芝麻，味道清新！
韓辣味脆米熱狗（$28）
韓辣味脆米熱狗則以豬肉腸、辣味豆瓣醬、芝麻脆米洋蔥醬、漬蘿蔔及青蔥做配搭，脆米熱狗口感好豐富，而且成個熱狗都好惹味。
意大利雪糕飛碟（$34）、手撕豬肉軟包（$38）
至於Gelato都係另一招牌，平時嘅Gelato口味離不開水果，呢餐廳於香港自設工場，以天然原料製作出唔同口味嘅Gelato($28/杯)。如清酒Gelato，選用大阪出品嘅利休梅青山綠水純米吟釀入饌，帶有豐富米味。仲有呢個用Gelato製成嘅甜品意大利雪糕飛碟，可自選一款醬及兩款配料，創造屬於自己嘅味道。另外仲有鹹點手撕豬肉軟包呀～
更多【新店直擊】： |
棉花糖雪糕（$32）、五款曲奇（$22/塊）
棉花糖雪糕味道香甜，即場燒至外皮香脆，食落外脆內軟；曲奇都幾有誠意，人氣口味有抹茶麻糬及朱古力拖肥等。
香芋拿鐵、開心果芒果冰趣（$42）
當然唔少得特飲喇，香芋拿鐵嘅芋頭味都幾香，而且唔會過甜，開心果芒果冰趣就幾特別，坊間好少見到開心果嘅飲品，呢杯開心果味都幾出，配搭埋芒果就多一份層次～
地址: 旺角亞皆老街8號朗豪坊12樓17-18號舖
文、相: Yanica