一直都聽講女仔有兩個胃，有一個係專for甜品嘅。到底係咪真？而家可以做實測啦！旺角有間樓上café，3、4月都做緊限定優惠，叫個套餐就可以加$1任食多款由日本直送嘅蛋糕！

呢間café原來係荃灣人氣café Daily 13嘅姊妹店，走悠閒風格嘅路線，有唔少綠色植物做裝飾，感覺放鬆。

 小食：脆炸黑松露雞翼

 蒜香辣椒蜆肉意大利粉配軟殼蟹、櫻花蝦濃湯

而家只要惠顧套餐，加$1就可以任食由日本福岡直送嘅蛋糕。套餐包有一個主食同埋櫻花蝦濃湯，特別推介蒜香辣椒蜆肉意大利粉配軟殼蟹，原隻炸嘅軟殼蟹大大隻，最吸睛，香口得嚟又唔覺膩。Base on 經典嘅意大利料理Aglio Olio再加以創作，師傅特意加入埋泰式辣椒膏等幾款辣醬，混和蒜頭、橄欖油同蜆肉製作，辣就唔算好辣，但豐富咗整體嘅口感，意粉則有嚼勁。

加$1就可以任食嘅日本福岡蛋糕，總共有12款口味，而每日大約會有9至10款口味供應，包括：日式原味芝士蛋糕、朱古力芝士蛋糕、抹茶芝士蛋糕、柚子芝士蛋糕、富士蘋果忌廉芝士蛋糕、Tiramisu 、柚子雜果慕絲蛋糕、奶茶蛋糕、栗子忌廉蛋糕、抹茶大豆粉蛋糕、朱古力忌廉蛋糕同埋焦糖果仁蛋糕。

呢幾款嘅蛋糕主要分為兩類，日式芝士蛋糕，同海綿忌廉蛋糕。兩者口感都比想像中輕盈，微甜不膩，就算食完正餐要食多幾件應該都冇問題。

 原味芝士蛋糕(左)、富士蘋果忌廉芝士蛋糕(右)

推介幾款必試口味畀大家啦~ 日式芝士系列中，最出色嘅係原味芝士蛋糕，芝士奶香十足，入口鬆軟。另外富士蘋果忌廉芝士蛋糕亦有驚喜呢，有粒粒清甜嘅果肉食到啊！

 抹茶大豆粉蛋糕(左)、奶茶蛋糕(右)

至於海綿忌廉蛋糕系列，可以試下抹茶大豆粉蛋糕，濃郁嘅綠茶中滲有清香，甜度適中；奶茶蛋糕面頭有開心果碎同焦糖醬，茶味溫和。

聽店主講，暫時任食最高嘅紀錄，係一枱兩人食咗超過30件呢！不過任食還任食，大家都記住要量力而為，同埋唔好浪費食物啊。

R.I.M.K
地址：旺角豉油街21號昌記大廈2樓B號舖

文、相、片︰Kar