開飯仔一向支持葵廣、旺中呢啲平民小店，之前開飯仔喺「旺中最新！4 大熱賣芫茜梳乎厘、玫瑰雪糕雞蛋仔」報導介紹過呢間旺中甜品小店，近期佢哋推出咗兩款令女生著迷嘅甜品系列：梳乎厘班戟、梳乎厘奄列！聽落好似幾吸引喎，即刻睇相先！

先介紹梳乎厘班戟，同其他梳乎厘做法相若，都係將打好嘅蛋漿放上煎pan，焗好一邊後翻面繼續焗。唔同嘅係，店子採用本地農場鮮雞蛋，蛋味濃啲又香啲，而且為咗減輕雞蛋嘅腥味，店子喺蛋漿加入「秘密武器」，令雞蛋只保留清香味！

班戟size比較大塊，「動」起嚟更加震騰騰，睇落都幾治癒。而且，班戟焗製時間焗得啱啱好，外層好鬆軟、軟綿綿，入面仲有少許半熟、濕潤嘅蛋漿，除咗食到香濃雞蛋味，仲有蜂蜜嘅天然甜味。

輪到梳乎厘奄列壓軸出場，甜品外形好似奄列咁，呈半圓形狀，睇落奄列相當大塊兼厚身，但入面依然濕潤，比起梳乎厘班戟再濕潤啲，食落內外反差更大、更滑溜，價錢為$35。

入面仲有啲士多啤梨粒粒，微酸，口感更清新。

至於朱古力味，奄列入面有啲比利時黑朱古力碎，被暖暖嘅奄列令朱古力變成半融狀，口感幼滑。

除咗以上兩款口味，另有原味、黑椒、Baileys、芫茜、紅豆、黑椒朱古力及辣味朱古力7款口味。不過梳乎厘即叫即製，而且製作需時，想食嘅話就畀啲耐性啦！

Chuck Close Dessert
地址: 旺角彌敦道688號旺角中心2樓SA 28A號舖

文：Joy