呢間進駐香港唔夠一年嘅過江龍日本蛋料理專門店，短短時間已經於香港開設咗五間分店，而第五間仲係以休閒農場為主題嘅旗艦店！旗艦店佔地2,000尺，全店以柔和原木色系貫穿成個「農場」概念，由小型籬笆、巨型雞蛋馬蹄座、小屋卡座、雞蛋形狀嘅共享餐枱到蛋殻造型吊燈等，巧妙地將旗艦店打造成充滿趣味嘅小農莊，盡顯心思。食物方面仲有推出一系列嘅全新雞蛋料理，雞蛋控不可錯過！
海膽碎金鎗魚腩終極TKG生雞蛋拌飯($118)
今次一次過新出咗三款口味嘅終極TKG生雞蛋拌飯系列，所有雞蛋都嚴選日本沖繩直送新鮮農場雞蛋，以粟米、海苔及艾草作為雞隻嘅飼料，孕育出獨有嘅鮮橙色蛋黃。金鎗魚腩蓉配上鮮甜嘅海膽，鮮上加鮮。
特上鰻魚終極TKG生雞蛋拌飯($82)
以日本靜岡鰻魚入饌，配上濃香鰻魚汁及生雞蛋，拌飯真係一流。
牛油果三文魚親子終極TKG生雞蛋拌飯($108)
鍾意清新啲嘅口味，可以試試呢個牛油果三文魚拌飯，牛油果同三文魚係絕佳配搭，好味又健康！
貓之全日早餐($88)
另外新店仲有期間限定Kids Menu，貓之全日早餐由日本豚肉腸、煙肉、茄汁豆、牛油果沙律、番茄仔和雞蛋多士配搭而成，最別出心裁係廚師將普通嘅煎雙蛋，以沖繩農場雞蛋製成貓咪模樣，相機食先之選！
燉牛肉黑咖喱蛋包飯($118)
墨魚汁咖喱由沖繩直，只帶微微辛辣，而牛肉係坑腩部位，長時間炆煮後肉質軟腍入味。
香濃海膽忌廉意粉($108)
幼滑嘅忌廉配上香濃海膽，每條意粉掛上濃濃海膽醬汁，啖啖都係鮮味～
玫瑰香濃朱古力($32)
地址: 大角咀海庭道18號奧海城二期UG層51號舖
文、相、片: Yanica