旅客比本地人仲多嘅台灣熱門餐廳！

話說開飯仔第一次去台灣嘅時候，日日就係瘋狂掃街，一次正餐都未食過。返到香港覺得有啲空虛，好似少咗啲嘢咁。所以之後幾次去台灣，我決定完美平衡正餐同掃街嘅比例，既能一嘗地道風味，又可以享受台灣餐廳獨有嘅文化，真係perfect池！以下就等開飯仔推介幾間深受旅客歡迎嘅台灣餐廳，當中大部份你可能已經聽過，但係佢哋絕對係名副其實，受得起呢份名氣啊！

全餐廳一齊乾杯　　乾杯燒肉居酒屋

Photos by paggie.lee.96 & Chao Hui Wu
呢間嘢係開飯仔嘅大愛，從食物質素、環境、氣氛、服務，我都會俾滿分！一入到去，就會見到紅磚牆壁貼滿咗客人錫錫嘅照片。原本，乾杯有個特別的傳統，就係每晚一到八點，店鋪所有客人就要互相乾杯，如果有客人咀對咀kiss十秒，就會有免費五花肉一碟。果然，一到八點嘅時候，店員就拎起支咪，口飛橫沬咁鼓勵大家互相乾杯，店員主持技巧純熟，吸引到全場目光，帶領著大家一齊倒數至八點，數到零個吓，碰杯聲此起彼落，超有氣氛！如果一乾而盡，店員仲會送多你一杯嘢飲添！

食物品質方面，仍然係冇得彈！開飯仔最鍾意佢嘅牛排，店員會詢問熟度，再幫你燒，佢哋將時間把捏得非常好，燒至外皮焦香，但內面仲係嫩滑，咬落去肉汁咇出嚟，好正！其他各種牛、豬，甚至小食如地瓜洋芋起司燒等，都冇令我失望。開飯仔認為，無論係買佢嘅氣氛定食物，旅客都值得一去！

廿款Häagen-Dazs同Movenpick任食　　馬辣頂級麻辣鴛鴦鍋

Photos by vivianhung & lovecala & IngePeng
去馬辣食火鍋一定要去信義區嗰間旗艦店，因為地方非常大，完全冇平時食火鍋個種好逼嘅感覺。呢間店嘅一大賣點，就係有20幾款雪糕任食，唔係普通牌子，係Häagen-Dazs同Movenpick！平時買一細杯Häagen-Dazs都差唔多30蚊，喺呢度真係淨食雪糕都抵！除咗雪糕外，蛋糕、水果、奶酪、啤酒等都係任取，媽啊！喺香港被貴價食物壓榨慣嘅你，點可以唔嚟個大解放？

火鍋方面，湯底選擇特別，有麻辣鍋、蔬菜精力鍋、膠原蛋白鍋等，唔使食嚟食去都係芝士鍋嗰啲。食材方面，雖唔係非常有驚喜，但都喺水準之中，食材都好新鮮，而且種類豐富，牛豬羊係例牌，但仲有各類海鮮、滷味，甚至連排骨都可以淥，真係你數得出嘅佢都有。

店員全部正妹帥哥　　咖啡弄

Photos by 咖啡弄 & dbbo
呢間嘢簡直係港女去台灣朝聖熱點，你可能會問，香港都有啦，洗乜去台灣都食？大佬，唔使排咁耐啊嘛！店內裝潢行自然風，色調明亮，仲有假花假草作裝飾，睇落好舒服，一貫台灣咖啡廳簡單自然作風。而店員多數係正妹帥哥，望落都幾養眼，哈哈～

至於食物就唔使我多講，勁到係香港開埋分店，冇番咁上下嘅水準點得？BBQ豬扒三文治面包烤得香脆，餡料豐富，夾著生菜、蕃茄、紫洋蔥，同燒到外脆內軟嘅豬扒，相當吸引。此外，飲品都係一大Highlight，首推冰果茶，淨係望著個玻璃樽，裝著唔同切片新鮮水果，已經覺得好有High- tea feel，飲落去酸酸地，混合唔同水果嘅甜味，Fresh！

馳名waffle　　蜜糖土司專賣店 Dazzling café Kiwi

Photos by Cannyyy & magng_hk
又係一間港女至愛，喺香港排餐死，人又多，邊似High tea架？所以就要嚟台灣呢間啦，唔使等位就可以入座，可以坐到兔仔櫈，等你可以舒舒服服咁享受吓台灣嗰種慢節奏生活。首推當然係最出名嘅草莓繽紛冰淇淋鬆餅，賣相吸引不在話下，窩夫鬆脆，配合啖啖忌廉好Creamy，再加上有新鮮果肉嘅草莓雪糕，真係甜到心都融埋。熟食方面水準都相當好，開飯仔尤其中意青醬奶油雞腿麵，睇落綠綠地，幾特別。雞腿香口，青醬味道濃郁，意粉彈牙，好有口感。

文：段

隨時接收最新資訊
讚好OpenRice專頁！