踏入九月，中秋都嚟緊，但依舊無阻香港人食雪糕嘅心！行轉便利店同超巿，又發現有新雪糕喇喂！都係果味系列，超吸引的說。

日本果肉粒雪糕批

先講呢兩條嚟自日本嘅雪糕批，芒果味同士多啤梨味。就咁睇包裝都好吸引，一粒粒果肉突晒出嚟咁。打開見真章~~ 係一樣㗎！完全符合包裝上嘅樣，正面睇有好多果粒。

芒果嗰隻當然就有芒果醬，配嘅都係芒果雪糕！全條都係芒果，直情就好似食緊嚿冰芒果咁，好香甜。

至於士多啤梨嗰隻，雖然雪糕唔係士多啤梨而係牛奶味，但同樣佈滿士多啤梨果肉同士多啤梨醬，甜中帶點酸，啲果肉仲好有冰感添！

唔好話開飯仔唔提醒你，拎起雪條嗰陣小心啲呀，唔好太興奮一拎就拎，最好輕輕擠壓一下個邊邊，確保起到條雪條先拎起，如果唔係就有機會斷棍喇科科。

Haagen Dazs 柑橘雪菓

另一款新雪糕係港人長期飛佛嘅哈根大斯出嘅，柑橘雪菓味。柑橘係意大利南部嘅，橙呢就巴西嘅，夾埋一齊又甘香又酸甜，而且今次呢款味冇牛奶成分㗎，食落感覺較light。

做多少少功夫，雪菓就可以變身成為解渴特飲喇。步驟好簡單，將vodka、檸檬甜酒倒晒入個壺度（如果唔飲酒嘅可以用伯爵茶代替，建議加埋橙皮同檸檬皮），加冰搖勻，倒返落杯之後再加入sparkling water，攪勻，最後就嗶多球雪糕落去，大功告成！開心跳起YEAH！

文、相：Kar