講到越南菜，都會即刻諗起Pho、春卷、扎肉等經典菜式～其實香港都有唔少摩登嘅越南菜餐廳，主要揉合西式烹調手法呈現不一樣嘅越南菜式，保留傳統嘅優點之餘又令人有新鮮感，一齊睇下邊間啱食！

目錄

海邊越式餐廳 Bistro Hoi An 

位於屯門黃金海岸嘅摩登越式餐廳，設有露天雅座，入口處仲掛上七彩繽紛嘅燈籠，好啱假期入嚟chill下～主廚多次遠赴越南當地親身取經，將各款富有當地色彩嘅菜式加入全新元素，炮製獨一無二的摩登越菜。如越式生蝦刺身，選用柑桔魚露汁、香茅、黑椒、椰子水及青檸，作為開胃菜就最適合不過。會安烤乳豬慢煮8小時後再放入焗爐烹製，比起粵式乳豬更香脆薄皮，用生菜包住食更可以減低膩感。另外仲有越式生牛肉他他、炭燒豬腩肉串燒同越式炒田雞腿都好值得試。

招牌安格斯牛肉湯河+烤牛骨髓 春庭越調

圖: RheaChim

一間裝修得幾雅致嘅越南菜，本店於灣仔，喺尖沙咀都有分店～必試招牌安格斯牛湯河+烤牛骨髓，湯底幾重牛肉香氣，唔會太油膩，建議大家加配特色烤牛骨髓食，會令成個湯底更重牛香！安格斯牛肋扒近乎入口即溶，好出色。烤紐西蘭有機蠔表面加上醃紅蔥頭及蒜片，充滿東南亞風味。椰香海膽煎脆餅都好特別，海膽配上椰漿醬，加埋香脆嘅煎餅，估唔到又幾夾。

創意滿分 NAM VIET NAM CAFE 

圖: vanessafoodiary

南越Fusion菜主題餐廳，有大家常見嘅牛肉粉、越南法包，亦有平時少見嘅越南街頭小食，好似去咗越南旅行咁呀～如脆米紙薄餅，靈感嚟自街頭小食越南煎餅，但將餅底改為炸米紙口感輕薄香脆，配搭越南香腸、蝦乾、秘製酸瓜，同檳榔葉等，酸酸地幾好味。五香豬腩伴鍋巴口感甘香鬆化，而且好入味，配埋鍋巴一齊食，口感層次豐富。另外有得飲南越蛋咖啡，表面係有焦糖脆面嘅蛋醬，先飲到焦糖甜香，然後係蛋醬嘅雞蛋味，最後係咖啡嘅濃郁醇香。

越南出生大廚主理 Nhậu 

圖: Joy zou

於越南北部出世、曾受法式Fine Dining培訓嘅餐廳大廚兼老闆Que Vinh Dang主理，以創新手法演繹越南南部同北部多種美食！推介Roasted Cauliflower with Caramelised Pork Koh Quet，先將椰菜花烤過增添香味，搭配用黑毛豬腩肉製作嘅醬汁、黑毛豬腩肉粒、自家製豬肉鬆及以黑椒調味，香口又惹味。甜品斑斕雪糕都好推介，重椰香又唔太甜。

文: Yanica