成日都要幫零食櫃添置零食嘅朋友仔，最近新出咗兩款幾特別嘅零食呀，都係茶餐廳風味系列嚟，一樣係曲奇，一樣係薯片，聽落好似好得意咁，食唔食得過？即刻同大家試真啲！

茶餐廳風味曲奇   龍島美食店

先講曲奇，連個包裝都好茶餐廳，係舊陣時嗰啲綠白格仔階磚樣，幾靚呀。Total有六款味：菠蘿油、紅豆冰、凍檸茶、姜檸樂、鮮蝦雲吞同豉椒。就咁睇名，真係會覺得呢幾隻味，同曲奇大纜都扯唔埋。

拆開望埋曲奇個樣，除咗紅豆冰同菠蘿油可以即刻spot out到之外，其餘4款都比較難以貌取餅。

(左)檸茶、(右)姜檸樂

不過，一食落去，就即刻分得到喇。每隻味都好鮮明，檸茶同檸樂嘅檸檬味都幾香，姜檸樂嗰個偏甜少少但幾好食，可以試下整杯真‧檸茶同真‧檸樂邊飲邊食喎。

(左)紅豆冰、(右)菠蘿油

豉椒

紅豆冰、菠蘿油、豉椒都恰如其分，特別菠蘿油，由個look到味道都跟得幾足；豉椒好香口但又唔會話太鹹。

鮮蝦雲吞

最有驚喜就係鮮蝦雲吞，未食之前完全想像唔到會係咩味，尤其呢塊個樣，同雲吞一樣，都真係平平無奇，但食落就會「叮」一聲，又真係幾似喎，有蝦味㗎，脆脆地嘅口感幾過癮，係會想encore多幾塊嘅。

凍檸茶薯片  珍珍

由細食到大嘅珍珍，最近破格創新，推出凍檸茶味！脆卜卜嘅凍檸茶會係點嘅呢？好緊張！一打開包裝，即刻成陣檸茶味湧出嚟，玩blind test嘅話未食都會估啱。不過食落去，又冇聞嗰陣咁突出喎。

首先係會食到甜得嚟又有啲澀嘅檸檬同茶味，完全唔似食緊薯片咁。但一路咬碎到最後幾啖呢，啲薯片味終於飄返出嚟喇，仲隱隱帶住一絲絲嘅涼氣，好似薄荷或者冰極檸茶嗰隻feel。而呢隻薄荷味，仲會喺個口度逗留一段時間先至散去……

嗯，食完一塊，仲有好大包呀媽！嗚！
不過我相信，應該會搵到好多不怕死勇士一齊嚟挑機嘅，係咪呀哈姆太郎？

文、相：Kar